Heit es guet's nöis Jahr......

My Name isch Pax und i cha nume so viu säge: 

Mir si dankbar für das was isch gsy und 

mir fröie üs uf das wo chunnt!

Jetz isch es wieder so wyt, überall wünscht me sich es guets Nöis.....happy new year.......

S'nächscht mou wenn me muess s'Datum schrybe, isch es scho 2018 !

Me ghört d'Lüt säge: eee, die Zyt vergeit gäng schnäuer....scho wieder isch Wiehnachte und de isch's Jahr scho wieder verby. Aber nei, so isch es äbe nid. Es geit gäng glych schnäu.....das wüsse mir aui scho. Aber je euter as me wird, je schnäuer vergeit Zyt. Es so düechts eim ömu. Weisch no wie lang mir aus Chind aubes hei müesse warte bis es Oschtere worde isch? I ha de denn aubes dörfe s'erschte Mou Chnöisocke aalegge. Usser es isch de jetz würklich no chaut gsi...... 

Oder wie lang das es isch gange, bis zu de grosse Schueu-Sommerferie und Wiehnachte und bis zum Geburtstag isch es sowieso e Ewigkeit gsi.

Aber das isch haut eifach der Louf vo üsem Läbe. Drum packe mir ou im nöie Jahr aa was chunnt und mache s'Beschte druus. Blibet fröhlich und Dankbar und vorauem, nämets Läbe mit chly Humor, de geit aues ringer.......äbe.....d'Seel aube einisch chly la bambele la :-)

I däm Sinn wünschen i 

- mit aune däne wo zu mir ghöre - 

de Läser vo mine Gschichte 

es gfröits und gsunds 

2018

 E liebe Gruess und bis zum nächschte Jahr.......

Ursula und Urs, Pax, Manu, Chica, Esther und Nemo

Stärneföifi.....ke Internet!!

           das isch myni Gans, d'Martha.........sie chunnt nid i d'Pfanne, ne nei, ou wenns e so usgseht! :-)
                                    sie het nume über d'Nacht an es wärmers Plätzli müesse ga :-)

Also jetz stinkts mir de scho langsam, mir hei scho wieder ke Internet! Nei nid dass is täti gross vermisse, meh het ja so viel angersch ztüe als a däm längwylige PC z'hocke. So, oder ähnlich redt me sich doch drus......me möchti nid wahr ha, dass me abhängig isch vo dere mediale Wält. Aber äbe, jetz sis scho wieder fasch 2 Tag........und äbe, i muess zuegäh, i vermisses haut doch. Das Internet isch myni Verbindig zur Ussewält und die isch mir haut doch enorm wichtig. I lose Musigwälle, Nachrichte, luege Schweiz aktuell und Bauer ledig sucht!!!!!
Mir hei ja ersch vor nes paar Jahr e high speed Internetverbindig übercho. Vorhär isch aues übers Telefon (s'Normale!) gange. D'Verbindig isch aube so langsam gsi, dass me gwüssni Websyte gar nid het chönne ufdue und vo Radio lose oder e Dok Sändig aaluege isch me wyt ewäg gsi. Das isch jetz nümme so, jetz si mir o derby! Aber äbe, üse Tower vo der Gmeind Yahk, wo mir dranne sy, wird mit Solarenergie betrybe und irgendwie hei die Batterie afa streike. I dr letschti hei mir nume no es paar Stund Internet gha und zletscht nume no wenn d'Sunne gschyne het und vor nes paar Tag, het es de der Geischt ganz ufgä.
Zersch hei mir das mit emene gwüsse Humor gno, aber irgendeinisch han i müesse säge: Mir stinkts!! 
I bi sicher, der Urs und i si nid die einzige gsi wo du greklamiert hei, denn hüt het me schynbar die Batterie ersetzt oder mit em Generator chly ufglade. Holz aalänge, aber sit es paar ne Stund hei mir wieder Internet und i bi wieder mit der Wält verbunde.....Technik sei Danke :-)

Wenn de d'Öbe lenger wärde......

Jetz im Winter, wenn d'Öbe lenger wärde, dusse viel Schnee liit, de weiss i mi z'verdörle. Syt es paar ne Jahr, oder besser, syt i säuber Alpakas gha ha, duen i Wulle spinne. Bis es de aber so wyt isch und me die Wulle cha verlisme, gits es paar Arbeitsgäng. 

Zersch strählen i die gschoreni Alpakawulle (Fliess) düre Karter......hie han i wyss und schwarzi zäme kardet. Me cha das ou mit Handkarter mache. Wenn me chli meh Wulle het, isch dä Trummlekarter sehr gäbig.

Das git de chlini Strängli wo me cha verspinne. Das Karde isch e langwiirigi Aaglägeheit und au nid ganz so suber. I dr gschorene Wulle het es immer no e chli Heuschräschte, sie wird drum erscht nach em Spinne gwäsche. Wöu d'Alpakawulle ke Fett (Lanolin) het wie d'Schafwulle, cha me se guet grad so verspinne.

Mit däre Wulle han i planed e chli dickeri Wulle z'mache. So spinnen i eis Spüehli ums andere und am Schluss duen i de gäng zwe Fäde no einisch zämespinne.......zwöi Spüehli uf eis.

Isch die Wulle sowyt fertig gschpunne (hie isch es e bruni Wulle), duen i se vo de Spinnspüehli zum ne Chlungeli mache und due se Abwäge, so dass me e chli e Ahnig het wie viel Wulle uf eire Strange isch. Aus nächschts duen i se uf mis NidyNody.....das heisst würklich so :-) damit es de e schöni Strange git.

Denn wärde die Strange vorsichtig, i warmem Wasser mit chli Haarschampoo gwäsche. Me muess guet luege, dass es e kes Ghürsch git, süsch muess me aues no einisch abliire und neu Wickle. Dürs Wäsche wird die Wulle au weicher und flauschiger.

Isch d'Wulle de troche, duet me se schlinge..... und wenn me se wott verkaufe, de macht me no e Etigette......i mache aues säuber.....usser s'Flies hei mir miner Vierbeiner gliferet. :-)

Die einti Bruni isch gmischt mit Merinowulle.......und die unger isch 100% Alpaka.

I ha jedes mou Fröid wenn es Projekt fertig isch. Am Aafang han i no gloubt, i chönnti mir chly öppis derzue verdiene mit däre Wulle.....wenigschtens fürs Fuetter vo de Tier. Aber solang Alpakaprodukt zu Spottpriise abote wärde, isch es schwär für so chlyni Aabieter wien i eini bi. Ou wenn me de wüssti, dass d'Tier rächt ghalte si und d'Wulle nid vo Lüt gschpunne, wo fasch vergäbe müesse schaffe. Eh nu, i maches jetz eifach us Fröid wyter und lisme ab und zue e Chappe... 

Chica(no) es chlises Gschichtli

Das isch mini Chica, sie isch letschte September sächsi worde. Wo s'Chicceli no es Puppy isch gsy, isch sie es rächts Luusmeitschi gsy.
Mir hei sie im Jänner 2011 zu üs greicht. Sie isch mis Geburtstagsgschänk gsi....aber über das es andersch mou. 
Die chlyni Chica isch auso öppe vier Mönet gsi, so richtig i de Flegujahr, wo mir Bsuech hei übercho. Der Bsuech het d'Schueh, Händsche und Chappe abzoge und im IIgang häre gleit und mir si i d'Stube ghöcklet und hei es Kaffi  trunke und chly verzeut.  Do gsehn i us de Ougewinkle, dass die chlyni Chica mit der Chappe vom Bsuch verby flitzt. I bi ufgschtande, har ihre die Chappe wäg gno und sträng gseit; Chica, NO! Für nes paar Minute isch de Rueh gsi. Aber d'Chica het nid ufgäh und isch jetz mit emene Händsche im Schnuri verby gseklet. I mache s'glyche und säge; Chica, NO! Jä nu, sie isch haut no i der Erziehigsfase, han i die Chlyni entschuldiget. Es geit de gar nid lang, chunnt d'Chica mit emene Finke vo mir umen Egge gschosse. I gloube sie het genau gwüsst was chunnt. Aber viellicht het sie dänkt, wes sie schnäu gnue wäri .....de viellicht.....
Aber nüt do. I bi der Chica nache und hare de Finke wäg gno.  Chica, NO! und  han i ihre es Spielzüg vo ihre häregleit. Da isch natürlich nid haub so witzig gsi wie vorhär die Finke oder Händsche. Item, wo sich de der Bsuech nach öppe zwe Stund wieder verabschiedet het, het Conny, jedem Hund tschüss gseit und zur Chica het sie gseit; "and you Chicano, be a good girl, o.k? :-)  Me hätti scho der Idruck chönne übercho, dass mim Boxerli si Name nid Chica, sondern Chicano wäri.....

Was für nes Gjammer....

I däre Gruppe won i bi, won es mir o gfaut, isch mir ufgfaue, dass es mängisch würklich es Uuuuhuere (sorry) Gjammer isch. Eis vo de Mitglieder het postet, dass es äbä jetz so ne Maschine gäbi, wo me d'Ichöif säuber chönni scane. I ha dä Itrag mit inträsse gläse und dänkt, ja das stimmt, bi üs gits in Cranbrook (nid in Creston) scho sit meh as emene Jahr die Äria wo me cha säuber siner Artikle dürezieh und de mit der Bank- oder Creditcharte cha zahle. I ha mi bis vor nes paar ne Wuche nie trouet, dert z'ga.....i ha normalerwys ou immer meh, as die erloubte füfezwänzg Artikle. Aber äbä vor nes paar ne Wuche bin i wieder in Cranbrook gsi und i ha das Mou nume es paar wenigi Sache gha. A de Kasse het's ziemlich viu Lüt gha und i ha mir grad überleit, won i ächt am beschte düei aschtah. Da chunnt e nätti Frou uf mi zue, luegt i mis Wägeli und fragt mi, öb i nid wöu säuber scane, es gieng doch viu schnäuer. I ha chli unsicher glächlet und gseit; " I don't know how to do it!" Sie seit; kes Problem! Es  si immer eini oder zwe Persone dört wo häufe. Auso bin i muetig zu dene Scaner häre und scho isch e jungi Frou cho und het mir zeigt wie das geit. Sie het das uf ene fröhlechi ufgschteuti Art gmacht und het während däm i scaned ha mit mir brichtet. Zwüschine isch sie hurtig a nächscht Scaner gloufe und het emene eutere Maa wyter ghoufe. Ja, es het nid ume Jungi a dene Scaner, es git äbe ou ufgschlossni euteri Mönsche. Und vo wäge: "oh jesses, niemer isch meh da.....niemer seit Guete Morge, Danke oder Adieu.....das isch doch e Quatsch und eifach nid wahr. 
Und abgseh vo däm, wenn de Qualität vom Mönsch sy, vo settigem abhanget, ja de chönntis eim de viellicht scho chli Angscht mache. Aber i hoffe doch schwär, dass das ou i der Schwiz nid der Fall isch. Wie wär is de, wenn me eifach nume e chli offener däne Sache chönnti gegenüber stah? Es chunnt wies chunnt und isch jetz eifach e so und es wird äuä ou nid angersch wärde i der Zuekunft. I kenne vierzg jährigi wo sich sträube und schwär düe mit der hütige Technik und i kenne settegi wo über achzgi si und gärn am PC umspiele. E Situation isch immer nume das, was me usere macht......

D'Geburtstagsmuffle

           Das isch üsi Bärnerin d'Cindy ---- mir hei sie leider scho vorn es paar Jahr verlore........

I ha denn no in Nidou gwohnt, won i mir s'erschte Mou Gedanke gmacht ha, über die Geburtstagsmuffle. Es isch e so gsi: Im Stätdli han i s'Bethli troffe mit ihrem Maa, em Kobi. Me het sich begrüesst, het gfragt wies geit und was gäng so loufi. Me gseht sich äbe nid so fliessig. Do säg i zum Kobi;"Ah du Kobi, du hesch ja geschter Geburtstag gha gäu, i wünsche dir nachträglich no alles Gueti, mögisch gsund blybe und viu Gfröits erläbe." I ha fröid gha, dass i der Kobi grad jetze gseh ha und vorallem, dass i dra dänkt ha. Kobi gseht das nid eso, er macht mit der Hand e Bewegig als ob er e Flöige müessti furtputze won ihm uf der Nase hocket. "Abba," het er gseit, "Geburtstag.....das isch doch e Tag wie jede andere ou. Immer so nes Gschiss mache." I bi über die Bemerkig ewäg gange und es het mi nüme plaget, bis vor es paar ne Wuche, do han i fasch die glychi Situation am Telefon gha. I ha erscht e Tag später usegfunde dass ihre Geburtstag isch gsi, so han i gseit:"Marianne, no nachträglich aues Liebe und Guete zu dym Geburtstag". Was chunnt zrügg? "Ach das! Geburtstag fiiren i scho lang nüme meh, isch e Tag wie jede anderen ou." Ups! 
Warum seit me das? Warum söu der Geburtstag, der Tag wo me isch uf d'Wält cho, nid wichtig si? Wenn me sich säuber nid wichtig nimmt, warum söue de die andere Mönsche eim wichtig näh? Isch es de nid fasch glych wie: Liebe deinen nächsten wie dich selbst! Ja wenn me sich säuber nid wichtig nimmt, cha me sich säuber de gärn ha? Wenn nid, wie geit de das mit de Mitmönsche? Muess me nid by allem zersch by sich säuber afa, bevor me cha use gah und öppis wytergäh oder teile?
S'glyche seit doch dr Spruch: Wüsch du zersch vor der eigete Tür, bevor angerne seisch wo's Dräck het! Es het doch scho öppis nid? Auso für mi isch klar: Wenn i mi säuber cha gärn ha, mi säuber ärnscht cha näh und mir wichtig bi, de chan i ou genau das a die andere Mönsche wytergäh.....und no öppis.....ou die andere gschpüre das. De git es nämlich no ei Spruch: Wie me i Wald rüeft, so chunnts zrügg. I däm Sinn.......e härzliche Gruess vom Ursi....

Dankbarkeit.......

                                     Mini Religion isch Liebi, Dankbarkeit und Respäkt!

I ha scho i dr Schwiz gärn Böim umarmet und mit Bachblüehte gschaffet. Bi liebevoll zu Pflanze, Mönsch und Tier gsi, aber sit i in Kanada läbe, bin i irgendwie no gschpüriger worde. Me het mi mängisch ou chli belächlet.....wäge Esoterik und so.
Eigentlich het Liebi, Dankbarkeit und Respäkt, gar nüt mit Esoterik ztüe. Es isch mi Wäg, um in Friede mit mir und der Umwält chöne z'läbe. Je lenger me d'Möglichkeit het i der Natur und ir Stilli mit sich säuber chönne uszcho, je dankbarer wird me. I bezeichne mi scho fasch e chli aus es Dankbarkeitsfreak.  :-)
Wenn me jetz nid aues würdi säubstverständlich näh, de müessti me ja scho am Morge Danke säge, wöu me wieder e nöie Tag cha i agriff näh. Düre Tag us gäbs de grad nomau x-hundert Gründ, für üs z'bedanke. Bi wäm? I gloube das isch gar nid so wichtig, a wän me jetz de Dank richtet, meh muess ne eifach im Härze gschpüre. 

Wenn i de mit de Hünd unterwägs bi uf üsem Bärg, de louft mis Härz über vor Dankbarkeit, Respäkt und Liebi zu dere vollkomne Natur.....ou wenn's huddlet und schneit. 

Wenn me sich Zyt nimmt und die chline Sache gneuer aluegt.....wenn me begryft, was da aues zämespielt, wie eis Redli is andere gryft, de chame nume respäktvoll Danke säge.
Wenn sich d'Mönsche würde bewusst wärde, wie viel Chraft i däm Wort DANKE steckt, viellicht würdis de o wieder meh brucht.....es gäbti de e Trend. :-)
Probierets doch eifach einisch us......sägit danke, dass dir chöit Ichoufe, statt über die Hektik schimpfe. Danke, für au die Freiheit wo mir hei, für d'Gsundheit, für d'Sunne und für e Räge. Das mir es Dach überem Chopf hei, e warmi Stube und e deckte Tisch und dänket mit Liebe a alli die, wo's nid so guet hei.....liebevolli und positivi Gedanke, bewürke mängisch Wunder!
I däm Sinn.....aues Liebe zu Öich......Ursi

Scho fasch chli Wiehnachte.....

                                                   Cranbrook im Sommer

Hüt bin i nach Cranbrook gfahre. I ha no einisch wöue go ichoufe, bevor der Winter zgrächtem chunnt. Mir überchöme zwar s'meischte ou hie in Creston, aber aues choschtet meh und me muess näh was es git. Cranbrook het viu meh Gschäfter und drum ou viu meh Uswahl. I ha no wöue luege für nes paar Winterschueh für mi und drum bin i  hüt so um die 10.00  losgfahre und ha die 85 Kilometer unger d'Reder gno. Es isch gäng wie ne chline Usflug und i gniesses immer sehr. Hüt isch es bsunders schön gsi, d'Sunne het gschune und d'Böim si schwär mit Schnee belade gsi. Es heit eim bländet, aber glychzytig het's eim z'Härz ufta. Trotzdäm dass es Samschtig isch gsi, het es fasch kei Verchehr gha. 
I was für emene Paradies läbe mir......

          das isch won i hüt düre gfahre bi....nume het es no nid ganz so viu Schnee gha

I ha aues gfunde won i uf minere Lischte ha ufgschriebe gha, ou Winterschueh. Bevor i mi uf e Heiweg gmacht ha, bin i no hurtig is Shopping Mall (es Ichaufszenter mit verschiedene Gschäfter) wüu i ha wüue Chinese Food choufe, für e Urs und mi zum z'Nacht. Won i bi dür nes Gschäft düre ghuscht --- vore iche und hinger wieder use --- isch mi Blick amene Päckli Guetzli blibe hange. Scho bin i es paar Schritt verby gsi, wos mi dünkt het: eh....was si das jetze gsi? I bi auso die drei Schritte wieder zrügg und ha die Guetzli gneuer agluegt. I ha mi nid düscht gha....."Kambly" hets gheisse!!
Ja i weiss, für euch i der Schwyz isch das nüt bsunderigs, wenn me es Päckli Kambly Guetzli gseht. Aber in Kanada, bsunders hie i üsere Region i de Bärge.....i däm Kaff.....

Wie han i mi chönne fröie über de Fund. Der Verchäuferin han i grad müesse mi Gschicht verzeue.....dass das us dr Schwyz chömi und dass i scho syt Jahre kener settige Guetzli meh gha heigi. Sie het sich mit mir gfröit und het glachet wo si mir de Ichouf überreicht het.
Isch das e guete Tag gsi.......fasch wie wenn es scho Wiehnachte wäre :-)

So ne Winzling.....

Letscht Summer, wo mir si bi üsere Boustell gsi, het dr Urs gseh, dass unger der Traktorhube es Rattenäscht isch. Es isch no läär gsi und mir hei ou dr Motor abgsuecht, öb sich nid doch no es Tier versteckt het. Syt ere guete Wuche isch dä Traktor dört unbenutzt gschtande und das het glängt, dass e Muetter dänkt het, das sig e guete Platz für ihri Chinderstube. Wo der Urs der Traktor gschtartet het, isch es passiert.......das Tier isch nüme z'rette gsi. 
Ou wenn si sehr läschtig chöi si, es het üs glich leid da. Am andere Morge, won i wieder mit de Hünd zu der Boustell bi cho, isch Chica ganz ufgregt ga umeschnüffle und denn het sie afa bäue. I bi ga luege was sie ächt  gfunde het und gseh, dass uf em Holzbode es chlises Rattebaby lit. I has i mini Händ gno und gschpürt, dass es chaut het. I ha nid gwüsst wie lang das chline Wäseli scho hie umeligt. Öb es ächt öppis z'tüe het mit däm Näscht unger der Traktorhube? Viellicht het e anderi Ratte die Chinder züglet und das hie, het si verlore. Ratte si sehr sozial und nähme Chind vo anderne Müettere a und zieh se uf.
I ha de Winzling i minere Hand gha und überleit, was ächt chönnti mache, de eifach so la si, dass han i nid übers Härz bracht. So han i das Baby Hei gno.

Deheime han ihm es Hulli gmacht und de han i googlet, nach ere Antwort, was me so weiss über gretteti Rattebabies. Nu, viu isch es nid gsi, aber jetz han i gwüsst, dass i däm chline Wäseli cha Milch gä und zwar uf verschiedeni Arte. Eini wäri mit emene Pippetli, oder mit ere chline Sprütze, wie mes öppe brucht für Medis für d'Chatze. Es geit ums probiere.  So han i ganz, ganz wenig verdünnti Milch warm gmacht und de han i probiert so guet es gangen isch, däm Rätteli Tröpfliwys Milch iztröpfle.......und.....es het würklich gschlückt.  I weiss aber, dass die meischte Tierbabies Chuehmilch nid guet verträge und drum bin i nach Creston gfahre und ha mi bim Tierarzt erkundigt, was i ächt chönnti näh. Dä het natürlich zersch mou gschmunzlet .....ja me kennt mi äbe scho.....es isch nid min erscht Rettigsversuech gsi!
I ha de Chatzebaby Milchpulver heigno und de hei mir wieder gfüetteret. I ha de Winzling mit mir umedreit, wöu dr Vet gseit het, so chlini Tierli chönne d'Körperwärmi no nid säuber regle. 

I ha de däm Baby e Name gä.....es isch dr Moritz gsi.....und wenn i ihn nid ha chönne bi mir ha, de het är e Bettfläsche übercho. Es isch e ganzi Prozedur gsi, won i ha müesse mit em chline Moritz mache. Nach em Schöppele,  han i ihn mit emene füechte Wattestäbli gwäsche und massiert, genauso wien es syni Muetter würdi mache. Zersch sis Gsichtli und de sis Büüchli, bis er es munzig chlises "Gschäftli" het chöne la ga. De het er sich gschtreckt und siner Beinli ganz läng gmacht und i ha mi gfröit dass es ihm so guet geit bi mir. I ha dr Moritz ou uf d'Waag gleit und gseh, dass er Grammwys zuenimmt. Der Urs het de mou gfragt, was i de mit em Moritz würdi mache, wenn er grösser wird.....mit üsne Chatze und so? Aber da han i eigentlich no nid möge drüber nachedänke. De isch de äbe de verhängnisvoll Abe cho. Mir hei es heftigs Gwitter gha und der Strom isch usgfaue.....für mängi Stund. I ha dr Moritzli näbe mim Ohr uf em Chopfchüssi gha und hane so gschpürt. Won är het afa gnürze, han i ihm die zwöiti chauti Mahlzyt gä.....i has sini Milch nid chönne warm mache und das het ihm nid guet da. Er isch haut würklich no sehr chlin gsi. I gloube sis Mägeli het das nis vertreit und mi chli Wicht isch i mine Händ gschtorbe........so isch es haut mängisch im Läbe. I ha mis Beschte gmacht und das het haut das Mou nid glängt......

d'Wöscherei vo der Frou Hueber

Mini Muetter het lang gäng deheime i der Wöschchuchi gwäsche. Me het e Wöschhafe gha wo me het aagfüüret, dass es de gnue heisses Wasser gha het. S'Muetti het de aube scho am Abe vorhär die fescht dräckige Sache i ne Züber iidrückt. Am andere Tag han i de aube o müesse häufe. So e Wöschete het guet zwe Tag duuret, me hets haut o nid so flissig gmacht.
Irgend einisch i de 60ger Jahr, het d'Frou Hueber bi sich Deheime im Parterre (z'Aarwange), e Wöscherei iigrichtet. Vier wyssi, nöji Wöschmaschine si dört, i Reih und Glied a dr Wand na gstande. Sogar e Tröchner het es gha, aber dä het me weniger brucht. Me het d'Wösch nass hei gno und se de ufghänkt......"öppis wird me de scho no chönne säuber mache," het mis Muetti gseit. Ja, vo denn a, si mir ou, so einisch im Monet, zu der Frou Hueber ga wäsche. Mit em Ahänger isch me de Wäg quer dürs Dorf glüffe, het die Wösch i d'Maschine gschoppet s'Pulver iche da und de het me gwartet. S'Heigo, het sich fasch nid rentiert. Mängisch han i o dörfe mitga......de isch de aube d'Frau Hueber cho "grüessech" säge. I gloube mis Muetti und sie, si zäme i d'Schueu. Mängisch het sie nämlich es Gaffee vo ihrer Chuchi abebracht und die zwe Froue hei chli zäme tampet. Me het chönne uf emene Sofa sitze und es het ou auti Zytschrifte uf emene chline Tischli gha. Aber mi het dünkt, i chönnti däm Dräjie vo dere Wösch, stundelang zueluege.
I ha später, won i hie in Canada bi gsi, mängisch a d'Frou Hueber dänkt. Mir hei nämlich am Aafang ou nid chönne wäsche. Mir hei fasch für zwöi Jahr ke fliessend Wasser gha und i bi mit üsere dräckige Wösch nach Creston i wash Salon gfahre ---- natürlich mit em Outo!!

Später, wo mir de afange mit em Schluch hei Wasser gha, het der Urs üsi auti Wöschmaschine vors Huus gsteut und ab und zue hei mir mit chautem Wasser gwäsche. Hüt macht me das ja wäge der Umwält ou. Im blaue Fass hei mir d'Wösch über Nacht iidrückt und erscht am Morge i d'Wöschmaschine da ...... es isch ou chli Goudi derhinger gsi! Wenn me so im Busch wohnt, de cha me sich das erloube :-)

Nume es Märli

Einisch, vor viele, viele Jahr,  het's no en achte Kontinänt gä, wo Feissbuchia g'heisse het. Uf däm Kontinänt het's ganz es chlises Ländli gä mit em schöne Name: Wunderwort! Ja, und i däm chline Land "Wunderwort" hei nume Mönsche dörfe läbe, wo äbe die "Wundersprach" verstande hei. Me het gseit, es sigi die gmüetlechschti Sprach uf em Kontinänt Feissbuchia und genau so sigi die Mönsche i däm chline Land. Wunderwort isch vomene Chönig regiert worde. Är het nid viu Arbeit gha mit sine Unterdane und drum het er sich überleit, dass er si Job doch grad so guet a öpper angerem chönnti übergä. So isch es cho, dass Wunderwort e Chönigin het übercho. Wie gseit, sie isch nid vom Volk gwählt gsi, sondern het ihre nöi Job meh durch Zuefall übercho.
Es paar Wuche lang het me gar ke Ungerschied gmerkt. D'Chönigin Admina het ihrne Unterdane mou hie es Lob gä, mou dört es "gfaut mir" hinger la und aui si z'fride gsi im chline Ländli.
Wie scho dr Chönig vor ihre gmerkt het, git's äbe gar nid so viel z'Regiere und drum isch es ou der Admina längwylig worde. So het sie agfange kommentiere, blockiere und lösche, was grad nid i ihri Schublade passt het. Gwunderig het d'Admina gluegt, was da jetz passiert. Innert churzer Zyt hei d'Unterdane vo Wunderwort afa ufbegähre, sie hei proteschtiert und luthals afa reklamiere. D'Chönigin Admina, het flyssig mitgschumpfe und so no meh Öl is Füür gschüttet. Ratlos und hiuflos hei d'Bewohner vo Wunderwort müesse miterläbe wie weni dass es brucht, um es Volk dürenang z'bringe. Ja, viel vo dene Wunderwort Iwohner überlege sich sogar, öb sie äch nid gschieder würdi uswandere......obschon doch Wunderwort s'schönte Land uf Feissbuchia isch.....

Die Gschicht isch frei erfunde, sött's sich aber doch öpper agschproche füehle de duet's mir leid.......

Bohnechrutt

                             Summer Bohnechrut (Satureja hortensis)

Geschter han i mis Bohnechrutt abgschnitte......Summer Bohnechrutt um genau d'si. Bohnechrutt ghört zu mine Lieblings Gwürz. I bruches fürs Würze vo ganz viele Gricht......houptsächlich natürlech für Bohnegricht, aber ou zu de Brathärdöpfu han is sehr gärn. Nach em Schnyde, machen i Büscheli  und hänke se im Hus zum Tröchne uf. 

Isch das Chrutt ganz troche, duen is vorsichtig i Gläser stecke und mit ämene Dechu verschliesse.......me chas de schön Abschüttle oder Abschtreife, wenn me drvo wott bruche.
Die meischte Chöch/inne kenne d'Gwürzmischig: Herbes de Provence. Usser Rosmarin und Thymian, het's äbe ou Bohnechrut drby. Je nach Region wird däre Mischig ou no Oregano, Lavendel oder Majoran bygmischt.

S'Winter Bohnechrutt han i hie in Canada no nid gfunde. Das isch de chli intensiver im Gschmack und wird ou gärn als Arzneipflanze verwändet. Es söu häufe bi verschidene Lyde wie zum Bischpiu; Blähige, Durchfall und Magechrämpf. Aber o bi Hueschte und Verschlymige söi's Ärliechterig bringe. Im Google git's no es Rezäpt für Tee und mängs angersch.

Scho aus Ching het mir mini Muetter glehrt, dass me die Chrüttli söu schetze und mit Verschtang bruche. De ou mit Chrütter passt dr Schpruch; All zuviel ist ungesund!

Dr Herbscht, e gueti Zyt....

 



 Bis vor zwene Woche isch es no 28° bis 30° gsi. Vo einere Nacht zur andere isch d'Tämperatur abegheit und jetz isch es tagsüber no so 15° und i dr Nacht es paar Grad über dr Froschtgränze.  Churz, es herbschtet. Ou dr Wäg won i jede Morge mit mine 3- und 4beiner ga go loufe, het Farbe agno. Wenn d'Sunne i die Bletter schynt, chönnti me meine, sy sige us Goud. I ha die Zyt sehr gärn und i füehle mi sehr wou.  

 

Obschon  im Herbscht git's gäng viu Arbeit. Mir.....oder besser gseit dr Urs, muess gnue Füürhouz mache für ne länge Winter. I hiufe natürlich ou gäng mit. I due de bim Huus bygele.

Das han i no vo mim Vati glehrt. I dene Momänte chöme mir die Sache wieder ume i Sinn. Är het mir de aube zeigt uf was me muess luege, dass d'Schyterbygi grad chunnt und nid chierig wird.

I mache söttegi  Arbeite gärn, ou wenn me mängisch scho chauti Händ überchunnt. Es isch fasch wie ne Meditation. :-)

 

 

Dr Pax isch natürlich ou aune n'Orte drby, wo si' "s Muetti" isch! Är muess doch ufpasse, är isch e Guete Boy!

 

Aber im Herbscht louft o süsch gäng viu um üses Huus ume. Die zwöi Reh si dr ganz Summer cho für Wasser luege. I ha immer äs grosses Becki mit Wasser gfüllt gha. Si heis gfunde und gschetzt. Jetz bruche si de dä Zwüschestopp nüme z'mache, jetz hets de wieder gnue Wasser uf Bärg.





 Settegi Hüehner spaziere bi üs überall uf em Bärg. Sie si i dr Grössi vom ene Räbhuehn. Wie mängisch bin i scho erchlüpft, wenn so nes Huehn es paar Meter vor mir im Busch vom Bode ufgflatteret isch. Sie hei d'Gwohnheit, immer erscht grad im letschte Momänt z'flüchte. Drum sie sie e eifache Fang für d'Koyote.

Das da isch jetz äbe so ä Jäppi. Üsi Chica --- s'Boxermeitschi --- het einisch bim Spaziere e junge Koyotie mitbrocht. Won är de aber mi mit de andere Hünd gseh het, isch är drvo grennt. Mir hei viu vo däne hie i dr Umgäbig und vorauem i de mondhäue Nächt si sie gärn ungerwägs. De ghört me se de hüüle, göisse und jäppe. Ihri Sprach isch sehr viufälltig. 
Wenn i mit de Hünd uf em Bärg ungerwägs bi, hei mir öppe scho Begägnige mit Koyote gha, was normalerwys ke Gfahr isch.

 

 

 

Sit dir normal?

Sit dir normal? I meine, heit dir s'G'füehl, dir siget normal? Jäää...... wenn dir öich da nume nid düschit. I weiss vo was i rede. Füfzg Jahr lang han i nämlich ou gmeint i sigi ganz ä normali Frou. Bis i drvo ha afa rede nach Kanada uszwandere, zu mene Maa won i nume vom Internet und vom Telefoniere här ha kennt. Da bin i ungereinisch ke normali Frou me gsi. Gar mängi Meinig han i mir zu mine Uswanderigs Idee müesse  alose:"Du kennsch de Tip doch gar nid richtig. Was machsch de, wenn's nid so unsechunnt wie du dänksch es sötti usecho? Und überhoupt, was wotsch de in däm Kanada? Du hesch doch e Vogu, i dim Auter no so öppis verruckts ga mache." Je nu,  i ha s'Beschte us mine Wächsujahr gmacht und ha nid nume d'Hormon gwächslet, sondern ou d'Heimat. I bi mit einefüfzgi  nach Kanada usgwandert. Ha mis ganze Läbe ufe Chopf gschteut.  Die einte hei scho rächt gha, es isch nid aues so usecho wien is erwartet ha gha und nid aues isch besser gsi aus Deheime i dr Schwiz.....aber angersch.......ganz angersch.  Sit letschtem April bin i 16 Jahr in Kanada, im September si mir 16 Jahr ghürate und sit 10 Jahr bin i jetz ou Kanadierin.
Mängisch isch es guet nid normal d'si und überhoupt, wo isch dr "fun" wenn me gäng nume isch wie au die andere und nie öppis macht wo me nid sicher isch wien es usechunnt?
I däm Sinn e liebe Gruess us Kanada.......

E Gascht im Ghütt!

So hei mir vor 16 Jahr agfange......mir hei e chline Trailer kouft, wo me mit ämene Sattuschlepper vo Creston här, uf üses Grundstück het zoge. Dä Trailer het aues gha, was äs brucht: äs Chucheli, Stube, Bad und äs Schlafzimmer. Mir hei scho denn zwe Boxer gha und d'Wohnsituation isch sehr beängend gsi. Äs het mi richtig brucht -- energiemässig. I bin e Mönsch, wo gärn mou Tür zue duet und seit: jetz löt mi sy. Nach em erschte länge u chaute Winter ....mir hei Gasheizig im Trailer gha....hei mir üs entschlosse, azboue. Dr Urs het vo üsem Huus, gäng nume vom ene "Profisorium" gredt. Trotzdäm, mir hei meh Platz brucht.

Dr Abou isch lenger und breiter worde aus dr Trailer. Äs nöis Bad, äs grosses Wohnzimmer und..... äs Zimmer für mi!

E so gsehts hüt us.....und ou 16 Jahr schpäter, läbe mir immer no i däm Profisorium! Mir läbe nid schlächt, äs isch eifach und mir g'fauts......ä huufe Bäum rundume und Natur pur...... im Momänt ä chli z'viu pur!
Sit es paar ne Wuche hei mir ä (liebe) Gascht.......äs Eichhörnli. Äs plaget mi scho sit Nächte........dir chöit öich das gar nid vorsteue? Ja, äs het äbe nid jede so näs Ghütt, wo d'Eichhörnli chöi ine schlüfe und äs Näschtli mache. Bi üs geit das.
Nacht für Nacht schlaft das Hörnli jetz Wand a Wand mit mir......und das tät mi nid störe. Aber z'mitz ir Nacht ghörsch äs Chräble und Gnage.....äs schrupft d'Isolation zur Wand us......sehr wahrschinlich für nes wermers Näscht für e Winter! Mit emene Flöigetätscher chräble und schlan i de vo mire Syte vo dr Wand, genau dört häre, wo das Grüsch härchunnt. Die paar erschte Mou het das Idruck gmacht und dä chly Wicht isch ruehig worde und het sich verzoge. Aber nach es paar ne settige Attacke, het ou äs gmerkt: Usser ämene grosse Lärme, passiert da nüt. Aber mir roubets dr Schlaf und nüt macht mi so hässig wie das. Auso han i mini Falle gschteut und mit ämene Rüebli aus Köder ufgsteut. I weiss,
das Eichhörnli het ä feschti Route. Äs springt vom Egge vom Huus --- dört won äs wohnt! --- übere uf's Grüenhuus, abe uf ä Gartehaag , seckelet bis as Ändi vo däm Haag und mit eim Satz uf ä nächscht Boum uf dr angere Site. I ha dänkt das sigi  ä churze Chut. I steue die Falle genau uf sim Wäg uf, äs gseht das gluschtige Rüebli und schwupp!

He!!!! hesch gmeint? Das isch öppe vor 3 Tag gsi! Dä Wicht wohnt gäng no Wand a Wand mit mir und närvt meh as am Afang.

 

Fräch hocket's vor sim Igang und luegt mir zue, wenn i dä Blueme Wasser gibe, oder im Grüenhuus öppis mache........

I gloube äs het sich a mi gwöhnt......wenn i nume chönnti s'gliche säge.....

und was nimmt me mit?

Dr Rauch hanged i de Böim und chratzet eim im Hals. Hüt isch es bsunders schlimm. Wüu, sit äre guete Wuche brönnt es in Moyie. Nid im Dorf säuber, nei am änere Ufer vom See. So wyt me gseht und weiss, nume Wald und dä brönnt jetz. Scho meh as 1000 Hektare, i däre churze Zyt. Äs het aber ou Mönsche wo dert läbe, es het Camping Plätz und Feriehüser.



Fahre mir vo üsem Grundstück uf d'Highway, denn geit es links nach Moyie  und Cranbrook (85km) und rächts, nach Creston (25 km). Mir läbe näbenusse, a dr Highway 3, dr einzige Verbindig zwüsche Creston und Cranbrook.
 S'Füür isch jetz wyter ungerwägs gäge Cranbrook zue (20'000 Lüt). Unberächäbar frisst es sich dür de uströchnet Wald und Busch......
Aber vo dr angere Syte, vo Creston här.....isch ou aues zue mit Rauch. Es brönni äbe au i de Staate. Creston isch nume 10 Kilometer vo dr Gränze wäg und dr Rauch chunnt je nach Wind, haut de ou bis zu üs. Hie het es so viu Wald, wenn mes nid säuber gseh het, me cha sich das fasch nid vorsteue.......und wenn das einisch afat brönne.......sie chöme dene Füür eifach nid z'Bode und wenn eis würklich glösche isch, chöme scho wieder drü angeri......über 500'000 Hektare Land isch dä Summer scho verbrönnt und immer no si meh als 150 Füür aktiv.

Mini Nachbarin Dana, het mir jetz gseit, si heigi gäng dr Truck (Pick up) packt mit auem was me so für nes paar Tag bruchti --- sie het füf Hünd! Sie het mit so Evakuierige ihri Erfahrige gmacht. In Kelowna, wo sie bis vor 3ne Jahr gläbt het, het es 2003 e grosse Brand gha. 20'000 Lüt heigi innerhalb vo 30 Minute müesse flüchte! Drum han i mir de vorgno, dass i ou wetti es paar Sache zämetue, wenigschtens so, dass me 2-3 Tag chönnti uscho. I ha afa Wasser i 4l Milchchanne füue (für miner 3 Hünd) und aui Halsbändeli mit Line won i müessti ha. Für d'Chatze es Gheg, und Fuetter für aui. Ou für üs, gnue Wasser, Chleider zum Wächsle, Uswyspapier, Toilettesache und es paar Medikament für e Notfall. Das Zämeträge vo däne Sache het mir guet da. Es git mir chli Sicherheit, denn die Gelasseheit wo d'Kanadier hie zeige, die fäut mir aus Schwizer ächt. Aber je länger i jetze Zyt zum Überlege ha, je meh Sache chöme mir i Sinn, won i  doch o no möchti mitnäh......eigentlich isch eim doch aues lieb u wichtig. Öb so nes Erläbniss viellicht ou öppis guets het? Viellicht wird eim o wieder einisch bewusst, wieviu Sache me het, und wieviu drvo me gar nüme brucht. Me chönnti se wyter gä, zu öpperem wo's würklich nötig het.
Mir hoffe jetz natürlich, dass mir i nes paar Tag wieder chöi uspacke und zum Alltag überga.
Wie giengs de öich i so re Situation? Danke für's Kommentiere :-)

und jetz han i no e Frag.....

das wäri jetz äbe eini vo dene Usnahme.....

E so oder ähnlich het mes I de letschte paar Wuche chönne i üsere Gruppe läse.
Z'erscht Mou het jede (oder ömu fasch jede) en Antwort ine gschriebe. Me hat vey wyt abe müesse redle um au die Yträg chönne z'läse. Irgendwie isch es no luschtig gsi. Grad nume e Tag später, die nächschti Frag: "so und jetzt möchti no wüsse"..... und die ganzi Musig isch wieder vo vorne los gange. Uf mi Iwand: "nei würklich?" Isch grad die nächschtig Umfrag gstartet worde. Ke Zyt zum Verschnufe, nei es geit jetz Schlag uf Schlag. Je nu de haut.  I ha de ou gläse, dass es ömu jetze louft i däre Gruppe. Es paar Mitglider hei sich de afa dr zue üssere und hei so es paar Wort i d'Rundi gworfe. Sofort het es zwöi Lager gä......me het gschribe, dass me doch enanger söi la läbe, oder me söu doch eifach wyter "scrolle" und gar nümme läse. Ja sogar vo: "de gang doch use wenn's dir hie nid passt! isch dr Red gsi.
Vo däm Momänt a han i für mi dänkt:"was isch eigentlich dr Grund, dass i immer no hie i däre Gruppe bi? Bruuchen i das Gschtürm überhoupt? Nei nid würklich. Aber es git i däre Gruppe äbe ou die Angere, die wo öppe glich dänke und wo me sich doch guet cha Ustusche. Ja und wäge dene "scrollen" i jetz bi däre ewige Frageri verby.....so guet dass das äbe möglich isch.
E aber jetz no en angeri Überleggig. Da fragt me; Ässit dir ou gmüetlich z'Morge? I meine, das isch doch e normali Frag, sofern das eim äbe überhoupt interessiert was Lüt  -- wo me eigentlich nid würklich kennt --- am Morge für Gwohnheite hei. I ha scho wöue häreschribe, dass i de unbedingt öppis z'Morge bruchti, aber am Sunntig sigi is de äbe wieder e chli angersch. De han --- Gott sei Dank --- grad no gseh, dass doch nid jede söu si Sänf dr zue gäh. Me chönni ja ou eifach nume es: "like it," drücke. Me mögi doch nid vo soooo viu ne läse was si de z'Morgen ässi, vorauem we de öppe zwänzg die gliche Gwohnheite hei....cha haut mit so emene z'Morgethema scho no passiere!
Aber isch es de nid so, dass wenn me e Frag i d'Rundi steut, jede öppis cha druf schribe? Süsch löt do eifach die ewigi Fragerei, wo d'Antworte doch niemer  list, la si.
I danke für's Läse und me cha ja hie nume es "like" drücke oder äbe ou abe scrolle und e Kommentar hingerlah.....ganz wien es passt :-)

E Tupf uf s'Fudi und ab i Busch

Vom Früehlig bis i späte Herbscht, han i im Schöpfli näbem Huus, e Läbendfalle für Ratte ufgsteut. I has scho mou erwähnt, üsi Ratte si bsunders schöni Tier. Sie hei e buschige Schwanz und ihres Fähli isch beige grau und glänzig wie ne chline Nerz. Die Tierli sie sehr suber, im Gägesatz zu dene Ratte wo mir so im landläufige Sinn kenne.
Und äbe, wöu si so schön si, möcht i se nid umbringe, sondern nume zügle. I bi nid drfür, dass me gäng grad aues umbringt, nume wüu s'Zämeläbe viellicht nid grad so eifach isch.
I ha scho es paar Ratte umgsiedlet gha, do seit mir doch e Nachbar: Das bringi de gar nüt. Die Viecher chäme immer wieder a dä Platz zrügg, wo's ne heigi gfaue. I ha das fasch nid chönne gloube, han i doch miner immer fasch 10 Kilometer ewäg vo üs, im Busch frei gla. Aber es het mir de doch ke Rueh gla. I ha für mi säuber müesse usefinde was da dranne wahr isch. Süsch wäri de mini ganzi Strategie für d'Füchs gis! Wo mis nächschte Umsiedligsopfer i dr Falle ghocket isch, han i churz entschlosse e Spray Dose mit Neonfarbigem Orangsch gno und däm Tierli e Tupf uf sis Fudi gsprayt.  So, sötti em Nachbar sini Theorie stimme, de müessti mi nächscht Fang ou e Tupf ha, wenn nid.......je de isch es de Usag gäge Usag!
Bis jetz han i no ke Ratte mit so mene orangschige Tupf i dr Falle gha und drum bliben i dranne!

Viu Lüt gruuse sich vor dene Tier. I ha gar kener Berüherigsängscht. Letschte Summer han i probiert es Baby uf z'päppele.....vo däm würd i gärn s'nächscht mou Schribe........

Am John siner dritte Zäng

Vor nes paar Tag han i mit mire Fründin em Ursi, (scho wieder es Ursi!) telefoniert. Sie chunnt ursprünglech us em Scharnachtal, läbt aber scho sit viele Jahr mit dr Familie uf ihrer Farm, i dr Nächi vo Smithers, meh nördlich i üsere Province. S'Ursi het mir verzeut, dass sie aui sige a dr 1. Auguschtfiir gsi. Die wird gäng vo Schwizer organisiert u isch sehr beliebt und guet bsuecht. Me trifft auti Bekannti, genau so wie Neuzuezügler und jede weiss öppis z'verzeue, so ou dr Hans --- hie in Kanada isch är dr John. Dr John isch wyt über 80zig, aber immer no e buschpere Maa. Är het mire Fründin verzeut, dass es ihm jetz wieder viu besser giengi, sit är siner dritte Zäng wieder ume heigi. Natürlich het s'Ursi gfragt, was de passiert sigi. Am John siner dritte Zäng si kaputt gange. Är het sich erkundiget, was är jetz drmit müessi mache. Es Fröilein bim Zahnarzt het ihm en Adrässe von ere Zahnklinik gä, won är siner Zäng söui hi schicke. Die Klinik isch in  Prince George, gueti vierehalb Stund Fahrzyt mit em Outo. Das het die Sach nid eifacher gmacht. Aber dr John het siner Zäng iipackt und nach Prince George gschickt. De het är gwartet.......und gwartet......
Nach es paar Wuche het's ne düecht, die Zäng sötti doch ume gflickt si. Är isch zum Zahnarzt und het gfragt, was är chönnti mache, siner Zäng sigi gäng no nid zrügg cho. S'Frölein am Empfang het gseit, är söu doch mou Platz näh, si täti de für ihn i dr Klinik nachefrage.
Die Frou uf dr angere Site (in Prince George) heigi glachet und gseit:" Isch das o wieder eine vo dene!" Sie heigi es guets Dotze Paar Zäng ohni Bsitzer. D'Lüt  schicki die Päckli ohni Absänder oder biigleiter Adrässe a d'Klinik und niemer wüsse meh, wäm, was, wo und am meischte! Äs gäbi nume ei Lösig, dr John müessi nach Prince George i d'Klinik cho,  sich dür die Zäng düre probiere und de findi me de siner scho! I ha die "Story" so luschtig gfunde und ha dr John grad vor mir gseh, wien är eis Paar nach em andere aprobiert, bis es de klick macht und er siner gfunde het. :-)

Morchle sueche......

Mi erscht Früehlig und Summer in Kanada uf üsem Bärg, het für mi ganz viu Nöis parat gha. I ha meh as 30 Jahr am Bielersee gwohnt und s'Läbe hie im Busch in Kanada, hätti nid ungerschiedlicher chönne si. I ha mängs glehrt bis hüt, bi ou mängem gägänüber chli glassener worde. Öppis möcht nech doch gärn verzeue.     

I ha äbe im erschte Früehlig, grad bi üs näbem Huus, drei Morchle gfunde. Mit däm han i überhaupt nicht grächnet gha. Natürlich han i mi sehr gfröit über dä Fund und überleit: "wenn's hie Morchle git, de gits sicher no meh uf üsem Grundstück." Nach em Mittag han i mis Chörbli gno und bi loszoge. Dr Hund --- mir hei denn nume d'Maite es Boxermitschi gha ---- han i extra deheime gla. I ha mi wöue uf d'Morchle konzentriere und nid immer luege wo mis Meitschi isch.
I ha gar nid so wyt müesse ga, bis i no meh vo däne begährte Piuze gfunde ha. Über jede einzelne han i mi gfreut und drby isch es gar nid immer eifach gsi, dür das Gschtrüpp und Baumstämm wo am Bode gläge si, düre z'cho.

Nach öppe 2 Stund im Busch umeloufe han i mir dänkt, jetz längts. I cha ja en andere Tag no einisch cho. So bin i zrügg uf e Wäg, wo zu üsem Huus gfüehrt het. Dört isch es so ruehig und friedlich gsi, dass i mis Chörbli abgsteut ha und uf ene Boumstamm ghocket bi. Die Stimmig han i chli wöue uf mi la würke.

 

Da, plötzlich chunnt es Reh zum Busch us, luegt chli ume und springt grad wyter.
I ha gar nid richtig Zyt gha zum Realisiere, chonnt us em gliche Busch wie vori  s'Reh, öppis angersch cho z'gumpe. Mi erscht Gedanke isch gsi: "Eh was macht de jetz d'Maite do? Ha se doch deheime gla?" Die vermeintlechi Maite nimmt e Satz über e Fäudwäg und mit emene elegante Sprung, hocket sie uf er Birke. Das si Bruchteile vo Sekunde und mis Hirni isch uf Hochtoure gloufe......das cha nid mini Maite si, Hüng hocke nid uf de Böim! Aber d'Grössi und d'Farb......oh jesses, das isch e Cougar (mir säge dene Berglöwe uf Dütsch)! Jetz isch mir aues i Sinn cho, won i gläse ha und was me mir verzeut het, was me macht, oder äbe nid macht, chunnt me Mou so ine Situation. I ha mis Chörbli gno, bi ganz langsam, langsam.... hingerschi gloufe......ganz langsam.....dr by het mir s'Härz bis i Hals ueche gschlage. Ersch dört wo dr Wäg e Biegig macht, han i trouet mi umzdräie und denn han i die Hingere vüregno. Ganz usser Atem bin i de bi üs deheime acho und i ha em Urs verzeut was mir passiert isch. Är het de gmeint: villicht duesch nächschts Mou dini Briue uf d'Nase. Aber die hätti mir i däm Momänt ou nüt gnützt. I ha de die Morchle la Morchle si und bi nüme ga sueche für meh.

D'Frieda (Fortsetzig)

                                          Das isch d'Frieda, es Jakobschaf.

Die erschte Tage won I miner Alpakas gha ha, bi n i fliessig i Stau abe, go luege, öb aues ir ornig isch. Freud han i a dene Tier und guet söue sis ha bi mir.Während i Wasser ufgfüllt ha gsehn i, dass d'Frieda dr Chopf sänkt und d'
Tiffany vou i d'Syte boxet. Die het nume es lisligs Grummle vo sich gä und isch chli uf zyte. "He Frieda," han i brüelet....."wotsch ächt ufhöre"! D'Frieda het mir ke Beachtig gschänkt,  si het grad no einisch Alouf gno und wieder het die armi Tiffany eis verwütscht. Jetz längts! I ga i Stau und chume mit em Bäse bewaffnet zrügg. Langsam gan i uf d'Frieda zue.  Die scharret mit ihrem dünne Vorderbei, sänkt dr Chopf zum Agriff und luegt mi drbi hässig a. I ha eigentlich ä kes vo ihrne Hörner wöue gschpüre und ha drum afa sanft uf si yrede. D'Situation het sich e chli entspannt. Mir isch i Sinn cho was dr Werner gseit het über die Fründschaft:"sie si scho gäng zäme gsi, me sötti se nid trenne" Auso i bi jetz grad überhoupt nüme sicher gsi,  öb das es so isch. I has de am Urs verzeut und är het gmeint: Dr Nachbar, grad ännet dr Highway, heigi doch ou Schaf, viellicht würd är ja d'Frieda zu sich näh?
Üsi nächschte Nachbure si Mormone.....die wo meh as ei Frou hei. I drüne Hüser wohne vier Froue und öppis meh as zwänzg Chind. Für üs machts ke Unterschied, mir häufe üs gägesitig us und was für ne Gloube dass sie läbe, söu nid üsi Sach si. I möchti das hie eifach nume zur Information schribe. Dr Kevin, s'Oberhoupt vo däm Clan het em Urs gseit, är chämi de am Abe einisch übere zu üs, das Schaf cho aluege.
So isches de äbä cho........dr Kevin isch mit zwe vo sine Jünglinge, mit em Pick up Truck cho d'Frieda aluege. Är isch beidruckt gsi vo dene Hörner und het gmeint; mo mou, so nes Schaf würdi är gärn zue sich näh. Auso los Giele.....lade mir das Schäfli uf!
I ha mi chli zrügg zoge und zuegluegt wie die drei, nei vier Manne, probiert hei, dr Frieda dr Wäg abzschnide. Kene vo dene junge Giele het dr Mum gha, d'Frieda bi de Hörner z'packe. Sie het die Manne in schacht ghaute, het gscharret und dr Chopf zum Agriff gsänkt.

Jetz het dr Urs en Idee gha:"probiere mrs doch  einisch mit chli Chörnli,!
Für die gingti d'Friede wyt. Genau so isches gsi. Wo sie dr Sack het ghöre raschle und s'Täuer gseh het, isch sie grad zum Urs cho und het afa frässe. Sie het sich la e Chauberstrick ume Hals legge und de heis sie s'Frieda chönne uf Truck uflade. I ha süsch immer müeh mit Abschied näh, aber das mou isch es mir ring gange.
Vo denn a hets Rueh gä, bi dene zwöine Meitschi. Jetz han i gseh, dass sie gärn gläge si und mit gschlossne Ouge wiederköiet hei. De Entscheid isch richtig gsi, D'Frieda het sich bim Kevin sine Schaf ygläbt und aues isch guet worde......

Miner Alpakas......

I verzeue nech jetz, wien I zu mine Alpakas bi cho.
Dr Urs mi Maa, zettlet gärn Sachen a und I muess se de später usbade. So isches ou mit üsne Alpakas gsi. Dr Urs isch vom Dorf hei cho und het mir verzeut, dass är bim Metzger dr Werner troffe heigi. Dr Werner isch en eutere Schwizer, wo denn im Nachbardorf gwohnt het, und jetz am zügle isch gsi. Är gängi nach Alberta zu sine Sühn, het är am Urs brichtet. Aber jetz heig är äbe no es Problem, är heigi  zwöi Alpakas und är wüssi gar nid wohi mit dene. Dr Urs, spontan wien är isch, bietet em Werner grad e Lösig a: E, mis Ursi het scho mängisch gseit, äs hätti gärn es paar Tier. I rede mit mire Frou und hinech duen i dr de Bricht gä.
Jetz han i auso müesse drüber nachedänke, öb i zwöi Alpaka wetti zue mir näh. "Chame die Tier mou ga aluege?" han i dr Urs gfrogt. Und uskenne duen i mi de überhoupt nid, mit dene Chlikameu......wirde de müesse Google!
Mir si auso no am gliche Tag zum Werner gfahre, damit i die zwöi Tierli mou ha chönne aaluege. Sie si uf dere chline Weid gsi und hei graset. "Je und was isch de s'Dritte? Für mi gseht das us wien es Schaf?" Dr Werner het mir erklärt, das sigi es Jakobsschaf und es sigi äbe gäng mit dene zwöine Alpaka Meitschi zäme gsi....me sött's se nid trenne. Aha......ja well.....so nes Schaf wird jetz wou nid aui Wäut frässe und Platz wird sich de o no grad irgendwie finde. Zu däm Zitpunkt hei mir aber weder e Stau gha no e Izüüneti Weid. Aber hie in Kanada seit meh gärn: No Problem!
I ha em Werner zuegseit, dass i die drü nämi, wenn är üs gnue Zyt gäbi,  dass mir chönne e Understand für die Tier boue. Dr Urs und i si hei gfahre und hei grad agfange mit Boue. Jetz han i mi richtig gfröit uf die Tier.

 

Mir si no nid fertig gsi mit däm Unterstand oder Stau, wo dr Werner telefoniert und seit: "Sit dir nache? Mi Suhn chunnt mi morn am Namittag cho reiche und de müesse die Tier wäg si." I bi churz igschnappet, aber das het jetz o nüt abtreit. Dr Werner het mi Hiuf brucht, für die Tier ine chline Ahänger z'Verlade. Bi däm Manöver han i de gmerkt, dass die Meitschi nid so reagiere, wien i das erwartet ha. "I ha gmeint sie sige zahm?" sägen i zum Werner. "Nei, nid würklich. Weisch i ha mi nid gross kümmeret. Ha se gfuetteret, aber süsch.....muesch haut de luege wie de z'schlag chunsch. " Ja merci schön.....das han i nume dänkt und mir hei mit Müeh und Not die Tier i de Ahänger buggsiert. Für die 45 Kilometer wird's scho ga. Wo mir bi üs deheime si acho,  isch es fruschtriert schwarzes und es ufgregts wisses Alpaka zu däm Ahänger use gschtakst. S'Schaf isch richtig hässig gsi und het das ou zeigt. Dr Werner isch wieder hei zue und het üs mit dere Schar allei gla.

Auso, aus erschts müesse jetz die Meitschi e Name ha. Zu dr wiude Schwarze säge mir Aisha, die stoutzi Wissi heisst jetzt Tiffany und die Hässigi rüefe mir ab jetzt Frieda! Z'friede han i miner Schützlinge agluegt..... ha se scho i mis Härz gschlosse gha.
Jetz hei mir ou gseh, dass sich würklich scho lenger niemer meh um die Tier kümmeret gha het. Vou vo Distelchöpf isch ihri Wulle gsi. Die arme Tier hei nid emou meh richtig chönne dr Chopf abe ha.

Nach es paar Tag hei dr Urs und i agfange und die Distlechöpf,  wo richtigi Chnüpple gä gha hei, mit ere Schäri usezschnide. Tiffany, het schön häre gha aber d'Aisha het bääget wie am Spiess und gsabbert. Agschpöit het sie üs nid, aber de grüen, stinkig Sabber isch eim über d'Häng und d'Hosebei glüffe. Aues het nüt gnützt, das het jetzt eifach müesse si.

So, das gseht doch scho ganz ordeli us......schön si sie, miner zwöi!

Nach es paar Monet si s'Aisha und s'Tiffany ganz zuetroulich gsi und si uf mis Rüefe cho ihres Gudi am Zuun abhole. Für nes Rüebli und chli Salat geit ou es chlises Kamel meilenweit ;-).

Warum s'Schaf Frieda nüme uf dr Foto isch? Das chöit dir ire Fortsetzig läse.....