Mähl am Ermu.......

Bildunterschrift hinzufügen

Mähl am Ermu..... und es Köötz i dr Chuchi....ja, es isch Guetzlizyt...

Wiehnachtsguetzli hani scho immer gmacht, aber i bi ou scho früecher immer chlei im Klinsch gsi mit dere Teigmacherei. Ig bache gärn Brot, Züpfe, Grittibänze, es Cake oder e Gugelhopf. I mache ou Schlüfchüechli oder Brätzeli gärn. Aber so ne chläberige Guetzliteig? Äääähhhh ender weniger. 

Wo si de im Konsum und i dr Migro hei aafa Guetzliteig aabiete, settige, wo me nume no het müesse Uströöle und Usstäche, isch mir e Stei vom Härze gheit. Do isch für mi mängs eifacher worde.

Aber jetz, jetz isch es wieder grad wie am Aafang. Wenn dr Urs und ig üsi Schwizer Wiehnachtguetzli wei ässe --- und das wei mir --- de muess i halt a d'Seck. Geschter hani de dr Mum gha und grad zwe Teige gmacht....e Mailänderli und eine für Zimetstärne. 

I bi grad am Eiwys schlaa, wos Telefon lütet. I ha wöue dr Mixer absteue, aber bevor mir das glungen isch, isch mer dr Bächer mit dr Masse us de Händ gschlipft. Dr Mixer het no dräjit und so ou dr Bächer. Die haubi Eiwysmasse isch jetz i dicke Schliirge uf dr Arbeitsflächi und am Schafttöri obe ghanget. Stärneföifi!!! I ha d'Händ gwäsche und sider het dr Urs s'Telefon abgno....mir hei äbä no es altmodisches. Wortlos leit är wieder uf und seit...."so ne blöde Aaruef wägere Kreditcharte, wo mir gar nid hei."

Ungerdesse hani aagfange das Eiwysmassaker äwäg zputze und ha nöji Eier us em Chüehlschrank gno. So, das ganze nochmal von vorne......

Hartnäckig blybt de Zimetstärneteig a auem chläbe, won er nume cha.....aber i chumen ihm z'Bode und er chunnt i Chüehlschrank. Voila.....jetz chöme d'Mailänderli dra. Irgendwie tuet dää Teig nid so hartnäckig, göb är ächt mis gschtörte Verhältnis zum Guetzle gschpürt het? S'Usstäche hani de wieder gärn gmacht, obschon äbä......die Zimetstärne si e chläberigi Sach blybe.

Zwüschdüre chunnt dr Urs immer wieder cho d'Nase strecke...."cha me scho probiere"?  Ja äuä de scho!!! Dihr gseht, bis am Aabe het es de doch öppis zprobiere gä......und.....sie si sehr guet cho......

Auso my Reschpäkt ghört drum allne dene wo all Jahr vor Wiehnachte x-Sorte säubergmachti Guetzli chöi ufsteue.....würklech!  Schöni Vorwiehnachtszyt mit ganz viune feine Guetzli, das wünschen i euch vo Härze.

  

Organisiere, strukturiere oder flexibel blybe?

 

Hüt isch Sunntig...i luege uf my Kalender und gseh, die ganzi Wuche hani nüt los, usser am Donnschtig. Am Donnschtig isch ygschribe:" Lunch mit Ruth." Ah guet, dänkeni, de het ja no auergattig Platz i dere kommende Wuche. Dä Lunch mit dr Ruth steit scho syt drüü Wuche uf mym Kalender. Sie läbt alleini, ihre Maa isch vor füf Jahr gschtorbe. I gloube es git e kei Tag, wo d'Ruth nid irgendwo häre muess oder sich mit irgendöpperem trifft. Mit emene spontane Gaffeebsuech, het me säute Glück. Dä voll Kalender git ihre Sicherheit, sie brucht das. I bi ender öpper wo sich nid zwyt zum Vorus wett la verplane. I nime mir aube o Sache vor, woni de am nächschte Tag chönnti, wetti mache. Aber die Idee si nid i Stei gmeisslet. Schynt d'Sunne, de chan i ganz spontan nach em z'Morge säge:" Urs, i mache es Fährtli," und de bini wäg. Meischtens si die Arbeite woni ha wöue mache, ou am nächschte Tag no da. Mit mynere angere Schwizer Fründin hinhägege, macheni gäng ganz spontan ab. Meischtens lüteni ihre am Morge aa, für ga z'Mittagzässe. Wenns passt de passts und süsch äbe nid. Wenn me pensioniert isch, de isch doch das die gröschti Freiheit, chönne zmache was me wott und wenn me wott und so lang me wott......Ömu für mi isch das ganz wichtig. So, jetz muess i aber doch --- um fair zblybe säge --- dr Morge isch mir heilig und da bini überhoupt nid flexibel! Wenn i ufstaa, de git es es paar Sache, die dörfe nid verschobe wärde. Zerscht müesse d'Hünd use.....de überchöme d'Büsi ihres Büchsli, de dueni d'Gaffeemaschine (Filter) aala und de luegeni einisch i Spiegu, göb i mi no kenne.  I dr cheutere Jahreszyt, macheni es Füür im Ofe im Wohnzimmer, de lani dr Radio aa und mir lose Musigwälle.....Wunschkonzert und Nachrichte. Bis denn isch dr Gaffee fertig und i hocke ab und gniesse mys erschte Gaffee. I gniesse das erschte Gaffe am Morge uf em Couche....ei Hund links, ei Hund rächts und uf dr Schoss es Büsi, das isch für mi dr perfekt Tagesaafang. Nach däm chunnt my täglich Walk mit de Hundemeitschi und nach däm bini gärn flexibel. :-)

Wie heit dirs mit öjine Tagesstrukture und Gwohnheite? Wie Flexibel chöit oder weit dir si?

Auso scho chlei früeh!

 

23. Oktober 2020

Won es vor nes paar ne Tag mou gschneit het, hei mers no locker gno. So einisch schneit es gäng im Oktober und nach es paarne Stund isch de aues wieder wäg.....so ou das mou. Mi düechts aube, dr Petrus wöui nume zeige, dass de dr Schnee parat wäri......zur richtige Zyt.  Äbä, wieni säge...zur rächte Zyt! Das heisst nid vor mitti Novämber. Meischtens hei mir i de letschte Winter, erscht grad vor Wiehnachte richtig Schnee übercho. Geschter am Abe het es de wieder aafa schneie....hüt am Morge isch es wyss gsi und es schneit gäng no. Es isch ou chaut gnue, dass er nid grad wieder wäg geit. Göb dr Petrus das Jahr öppis nöis wott aafa, dass är's im Oktober scho lot lo Schneie?

I ha doch no nie so früeh Vogelfuetter use daa, oder de nume, wenn es grad ganz strub dahet Aber jetz hocke die erschte Vögeli scho ums Vogelhüsi ume uf de Böim und warte uf Fuetter. Es chönnti ja si, dass er doch no mou wäg geit und dr richtig Schnee erscht im Januar chunnt? Wär weiss das scho so genau...mir nähme wies chunnt....

Es gschäftigs Tue...

I ligge im Garte uf em Ligistuehl und luege dene chline Viichli zue, wo so gschäftig tüe, ums Huus ume.  Aubot gheit näbe mir e Tannzapfe z'Bode und s'Hörnli, wo so am Chrampfe isch, chunnt düre Boumstamm abe cho luege, wo die Zäpfe glandet si. Es luegt mi aa und zeteret drby mordio, grad als ob es mir wetti säge, dass de das jaaaaa, syner Zäpfe sige. Dr ganz Bode isch scho übersäit mit chline Eschtli und harzige Zäpfe. Sogar a de Hünd blibe die chläberige Nadle hange und es git harzegi Bäggle im Fääli.

Chlei wyter äne uf em Dachegge, hocket es Streifehörnli und isch ou mit Fuetter beschäftiget. Ja me merkts, es herbschtelet und die Tierli schmöcke dr Winter. Es wird gsammlet, ghortet und versteckt. Es isch ä Tschäderete i dene Böim rundume und äs gschäftigs hin und här. 

Ungereinisch isch es stiu und i ghöre und gseh nüt me. Jetz hei si äuä e Pouse iigleit.....mache si ächt eifach es Schläfli.......wenn mir Mönsche e Gaffepouse bruche?  

I cha im Momänt nid so guet Loufe, s'Chnöi tuet mer weh und i bi zwunge e Gang abezschalte. Es isch mer, wie wenn mi s'Läbe würdi zwinge, mer chlei Zyt znää zum Lose und Luege.....

E Tagesuusflug

Auso ehrlich, mängisch isch doch e Tagesusflug genau so viu wärt, wie drü Tag Ferie. Klar, wenn me zwo Wuche i d'Ferie geit, de isch es scho nid zverglyche. :-)

Am Meer....horizontlos.....

So hei Ferie für mi aubes usgseh...i meine i mym früechere Läbe. Im Früehlig bin glücklich gsi, wenn mir für nes paar Täg nach Südfrankrych gfahre si, chlei go Sunne tanke. Im Summer mit dr Familie meischtens drü Wuche a Atlantik. Das Foto hani am Strand vo Biscarrosse Plage, (Frankrych) gmacht.

Ja, mängisch vermisseni söttegi Ferie am Meer scho.....es isch nid nume wägem Wasser, dr Sunne oder am Strandwandere. Nei, äs isch ou das Horizontlose, wo mir gfaut und hie fählt. 

We d'Ouge eifach chöi so i d'Wyti luege, ohni, dass gäng e Hoger vorne dranne isch. Dir gloubet mir nid, dass das cha es Problem sy? Mo mou, das chas äbä scho. 

Die letschte zwänz Jahr wohneni i dä Höger...überall wo me geit u luegt, het es Höger, Bärge oder höchi Böim. Da isch es mir äbä ufgfalle, dass myner Ouge e Fröidegump mache, wenn si einisch chöi horinzontlos luege :-)

Aafangs Wuche bin ig nach Cranbrook gfahre. Fürs z'Mittagässe hani mir -- wien i das gärn mache -- es Sandwiche gchouft, öppis ztrinke und de bini an es Plätzli gfahre, woni gärn öppe ga. Ke Chnoche isch dert gsi....i bi ganz allei a däm Seeli ghöcklet und ha d'Sunne und d'Rueh gnosse.

Aber gseht dir was ig meine? So schön es hie isch, d'Ouge stosse überall a Gränze.

Das mit em alleini si, isch ou nid so gmeint gsi. I däm Seeli het es ganz viu vo dene Schiudchrötli und i ha fröid gha, dass si nid wäg si und wyter ihres Sunnebad gnosse hei.

Syt miner Hünd jetz elter si, hani fasch meh drvo, wenn eifach nume für ne Tag e Uszyt nime und am Aabe de wieder Deheime bi. Süsch hanis aube scho gnosse, mou irgendwo schön go z'Nachtässe und de e ruehige Aabe zverbringe....

Aber dür die Coronazyt, isch aues chlei angers worde und i blybe zum Schlafe lieber im eigete Bett....und myner Meitschi danke mers. :-)

 

Bärner Mundart us Kanada

So, i freue mi, mys nöjie Büechli: 

"Bärner Mundart us Kanada,"

 isch fertig.

Es si 120 Syte worde, 

mit farbige und schwarz-wysse Fotone.

Gschichte und Gedanke us mym Läbe.....

vo dört (Schwiz) und vo hie (Kanada).....

me chas als e-book abelade 

oder als feschte Yband bym 

Tredition Verlag, bschteue.

Buch bestellen

Hie e Vorgschmack:

Eh, bisch du e Totsch

Hüt, bin i mit de Schneeschueh über e Bärg gwanderet, es het immer no z’viu Schnee, dass me chönnti bequem quer Fäld ii loufe. De Hünd geits eifacher, sie loufe über d’ Schneedechi und sinke nid y.

Es isch haut erscht Februar und bis dr Früehlig ou bi üs chunnt, geit es scho no es paar Wuche.

Wenn i aube so allei mit myne Vierbeiner ungerwägs bi, chunnt mir mängs i Sinn.

I ha die Zyt mit mir allei gärn, bruuche se.

 Äbe, hüt isch mir während em loufe, ou e Begäbeheit us myne Chindertage i Sinn cho. I bi viellicht grad i d’Schueu, won i für d’Wiehnachte es paar nöji Schii, übercho ha. Me het mir se nid ypackt gha, sie si eifach so, näbem gschmückte Wiehnachtsböimli a dr Wand gschtande. Blau si sie gsi, mit emene schmale, wysse Rändli, links und rächts.

Hani fröid gha. Bis jetz han i drum gäng nume bruuchti Schii gha. I ha äbe scho früech dörfe aafa mit Schiifahre.

Ou, wenn mir nid Gäld für Schiiferie gha hei, aber öppe am Sunntig mit em Gerber Car i Marbach oder Sörebärg, das si mir de scho. Und süsch si mir Chind - im Umkreis vo zwänzg Minute loufe - jedes Högerli ga abefahre, wo mir gfunde hei.

Äbe, Haldimas vor Sagerei näbedraa, hei jede Winter für üs Chind es chlyses Högerli präpariert. Das heisst, s’Högerli isch s’ganze Jahr dört gsi. Aber wenn es de Schnee gä het, de si mir dört mit de Schlitte, oder äbe de Schii, ga abefahre.

So han i nach dr Wiehnacht myner nöije Schii, ou a däm Högerli ygweiht. Die erschte paar Mal bin i schön, wie alli andere Chind, vorne abegfahre. Aber de isch es irgendwie längwylig worde und i has wöue uf dr Rücksyte probiere. Dört isch es de fasch sänkrächt abegange. Eigentlich wäris nid dänkt gsi, dass me dört abefahrt. Aber me het äbe nid mit mir grächnet gha. I bi obe häregschtande, wie ne Rennfahrer am Louberhorn und mit eme Aalouf s’Loch ab. Was heisst s’Loch ab? Das Högerli het villicht e Höchi vo drüü-vier Meter gha und drum bin ig im volle Aalouf, mit dä Schiischpitze, im Bode blybe stecke. Weder hingerzi no vürezi bin i mit myne Schii cho, sie hei im Schnee und vorallem im Bode feschtgschteckt.

Wo mir de myner Gschpänli us dere missliche Lag useghulfe gha hei, han i gseh, dass a beidne Schii, d’Schpitze obsi gluegt hei.

Mou, jetz isch es mir doch e chly angersch worde. Myner erschte, ganz nöije Schii…und jetz DAS!

Duuch, die ramponierte Schii ungerem Arm, bin i de heizue gschliche. Was hätti o chönne säge? My Muetter het mi nume aagluegt und gseit:„ Eh, was bisch ou für ne Totsch!"

Wo dr Vater am Aabe heicho isch und myni Erklärig zu däm Missgschick ghört gha het, het er scho chly gschmunzlet. I ha de schüüch gfragt, göb me se ächt chönnti lyme? Aber dr Vater het nume dr Chopf gschüttlet und gmeint:„Nei Meitschi, da isch Hopfe und Malz verlore, da gits nüt meh z’Lyme."

Zu mym Geburtstag im Jänner, han i de no einisch es Paar übercho. Es si kener nöije meh gsi, dr Vater het gseit, dr Herr Ilg a dr Aarwanger-Strass, heige se no i dr Wärchstatt gha, vo öpperem, won es paar anderi gchouft heigi.

Das isch mir aber Wurscht gsi und i ha mir schwär vorgno, nid no einisch so ne Chabis zmache.

Hie z’Kanada, tuen i nümme Schiifahre. Es isch mir zkompliziert und ig bi ou us dr Üebig. Es paar Mal han i dra dänkt, dass i chönnti Langloufschii choufe, aber wüu mir am Bärg wohne, macht das ou nid so viu Sinn. So gani - wenns passt - mit de Schneeschueh go loufe oder i trappe bym Loufe mit de Hünd, myner eigete Wägli.

Nach es paarne Tag si die guet ustrappet, wüu ou s’Wild, gärn dür die Spure louft. Nume d’Elche, mache ihre eigete Wäg. Mit ihrne grosse Füess, (grösser als es Ross oder e Chueh) chöi si nid i dene schmale Spure vo üs loufe.

Fasch jede Winter, gsehn i ou d’Spure vonere Elchchueh und drnäbe die chlyneri Spur vo ihrem Chäubli. Mir hei se zwar no nie gseh, aber i freue mi, dass si bi üs uf em Bärg läbe.

Ganz am Aafang, wo mir hie uf üsem Bärg gläbt hei, hei mir e ganz e schöni Begägnig mit ere Elchchue und ihrne Zwillinge gha.

Dr Urs und ig hei amene Aabe dusse, unger de Böim gässe, wo ungereinisch das grosse Tier, vor üs usem Busch uftoucht isch. Hingernache si ihri zwöi Junge cho. Ganz still und fasziniert, hei mir däm Schouschpiel zuegluegt und hei üüs a däm Aablick gfröit. So Begägnige tüe mi ou no nach zwänzg Jahr Kanada, töif beydrucke.

Vom gsunde Mönscheverschtand...

Vor anderthalb Wuche, het dr Urs über Halsweh klagt. Am nächschte Tag isch e verstopfti Nase drzue cho und denn het er afaa Hueschte. Klar, es paar Täg vorhär isch er mit em Traktor (für Stunde!)  uf üsem Grundstück umegfahre und het d'Winterschäde uf dr Iifahrt chlei usbesseret. Sehrwahrschynlich het er chlei Zug übercho...
Fieber het dr Urs nid gha, aber dr Hueschti isch ziemlich heftig gsi. Vor Covin-19 hätti ke Mönsch dra dänkt wäge däm em Doktor aazlüte. Me hätti sorg gha, Teeli trunke und Hueschtesirup gno. Aber jetze.....jetz isch aues anders. Drby hei mir hie in Creston und Umgäbig gar kener Fäll vo Corona. Dr Urs isch niene gsi und Bsuech hei mir o keine gha. 
Trotzallem lüten i üsem Husarzt aa und frage, wie genau die Symtom vo däm Virus de sige? Er meint, wenn mes genau wöui wüsse, müessi me e Tescht mache und das würdi er em Urs empfäle. Mir hei e Thermin übercho und si de es paar Stund später die halb Stund uf Creston ine zum Spital gfahre. Dört hei mir de dusse müesse warte und aalüte, dass mir jetz vor dr Tür zur Notfall sige. De hei mir im Outo gwartet, bis nachere gfüehlte Ewigkeit e Mönsch ire aschtronaute ähnliche Verpackig zu üs use cho isch. Er het em Urs Fieber gmässe und es Stäbli i d'Nase ufegschtosse und de si mir wieder Heigfahre. Das sie jetz füf Tag und es het no niemer vom Labor zrügg aaglütet. So näme mir aa, dass es so isch wie mir dänkt hei, dass es sigi. I dr Zwüschezyt geits em Urs ou wieder viu besser.
E Fründ vo üs reagiert jedes Jahr ziemlich heftig uf die erschte Polle und Böim. Für Wuche het er de gschwullni Ouge und e loufendi Nase. Bis jetz het me ne eifach uf sini Allergie aagschproche und gseit....."eehh bisch aber ou en Arme....geit ja gli verby."
Hüt, wenn öpper sich nume aasatzwys Räusperet, de überchunnt er bösi Blicke, dass er sich niene me hi  trouet. Er trout sich ömu sit Wuche nüme unger d'Lüt, drby isch er gsünder als mänge mit Mundschutz und Gummihändsche.
Es git Lüt wo dänke, wenn si Plastikhändsche anne heige zum go Iichoufe, de sige si gschützter. Ja viellicht stimmt das ou, SIE si gschützter....aber mi gruuset das, wenn i gseh, wie si mit ihrne Gummihändsche aues aalänge. Aber da gö dAasichte schinbar schwär usenang. Dr gsund Mönscheverstand isch da, i derä Corona-Zyt überhoupt nüme gfragt.....
Die Pandemie het üs veränderet....mir si e Schritt nächer bi de Aliens....viellicht han i ou nume zviu sciente fiction Filme aagluegt....früher.....
Heit nech sorg und dänket dra....nid aues macht Sinn wo die andere säge, jede Mönsch het e Verstand, ou wenn a däm mängisch zwyflet wird.

Vo Chirschiblüehte und em letschte Schnee

Bi üs uf em Bärg chunnt dr Früehlig gäng chlei später als in Creston. Nume grad 30 Kilometer ligge zwüsche üs, aber die heis in sich. Wenn zCreston scho überall die gälbe Forsytie blüehe, hettes by üs mängisch sogar no Schneeräschte.
Aber jetz isch es ou by üs sowyt und i gniesse die erwachendi Natur jede Tag uf mine Spaziergäng.

Geschter hani nach 10 Tag wieder einisch müesse go Iichoufe. Wöues so sunnig und mild isch gsi, hani nid nume i Lade wöue und grad wieder Hei. I ha mir fürs zMittag es Yklemmts und es Gaffee poschtet und de bin i Richtig Kootenay Pass gfahre.  I de Orchard  (hettes e andere Name in Bärndütsch?) in Creston blüehe jetz grad all die chlyne  Chirschiböimli. Es isch e wahri Pracht. I fahren also dr Pass zdüruuf....mis Ziel; ä Raschtplatz mit emene chline Loghüsli amene Seeli.....es gseht rächt malerisch us...im Summer!!

Won i öppe nach ere drüviertel Stund zu däm Platz chume, het es mi scho chlei überrascht, wie heftig dr Winter hie obe, uf e chlei meh als 1700m no isch.

I ha mis Sandwich verdrückt, mi lauwarm Gaffee trunke und dä Usblick gnosse...
De bin i wieder nach Creston i blüehend Früehlig zrügg gfahre.

D'Frag vo dr Distanz halte isch nid ufcho, i bi muetterseele allei gsi. Äs het auwä niemer gluschtet no einisch i Winter zrügg zgah :-)

dr Früehlig

Nach es paarne sunnige Täg, geit jetz ou bi üs dr Schnee langsam furt. I freue mi uf die Zyt, wenn i mit de Hünd wieder querfäldii cha. Hüt si mir langsam und bedächtig über e Bärg gloffe....gäng es Oug offe, für die erschte Bote vom Früehlig.

Sie si no chli die Pflänzli, aber nimer cha se brämse.....es isch jedes Jahr es Wunder......

Einisch, vor Jahre, han i bym Loufe das Hufise gfunge. De Nachbare (ännet dr Highway) ihri Jungmanschaft chunnt öppe mit ihrne Rössli chlei cho Usritte. Das stört üs überhoupt nid. Ihri Ross sie meischtens nid bschlage, aber irgend eis het si Schueh verlore.
Jedes Mal wenn i bi däm Stei chlei härehocke, mahnet mi das Ise a mis Glück....

Ou miner Meitschi heis gnosse, dass mir üser Spaziergäng wieder chlei chöi usdehne.

Es isch scho krass, obschon der Schnee immer no do isch, het dr Flieder vor em Huus scho Chnoschpe.....Jetz warten i uf die erschte Veieli und de isch dr Früehlig zgrächtem da. 

Und de han i mis Brot ou no grad la abchüehle......nei es isch es Stei!!! Won i dä hüt am Morge gseh ha, isch mi erscht Gedanke gsi: Öpper het sis Picknick verlore.....I häbes uf und gseh, dass es e Stei isch :-)
Euch e gueti Zyt.....es wird scho wieder......

Was wäri eigentlich wenn.......

Es isch im Momänt e schwieregi Zyt. D'Mönsche si verunsicheret wäge däm Virus und niemer weiss so rächt, wenn, wie und öb me überhoupt die Pandemie i Griff überchunnt und das git eim scho zdänke, macht eim Angscht.
Hüt bim Loufe über e Bärg han i mir so überleit, was wäri eigentlich wenn......
wenn i wie früecher all die Kommunikationsmüglechkeite won i hüt ha und wo zu mim Läbe ghöre, gar nid hätti? Kei Fernseh, kei Internet, kei Telefon, nüt wo eim stündlich mit immer neue, negative Nachrichte versorgt und ermahnet.

I loufe für zwe Stund düre Wald, über d'Alp....gseh keis Huus und mir begägnet kei Mönsch, nüt isch zgschpüre vo Virus und Pandemie.
Wenn i dr Chopf nid voll hätti vo dä Nachrichte vo geschter am Aabe und hüt am Morge, vo all denä Massnahme und Vorcherige wo aagordnet wärde.....es chönnti doch si, dass i de gar nüt wüssti?
I würdi zfriede und glücklich mis Läbe läbe und nüt angers mache, als was i süsch ou mache. Einisch i dr Wuche giengt i is Dorf,  für mi mit denä Sache iizdecke won i für die nächschti Zyt bruche. Viellicht würd i mi de Frage, warum usgrächnet sGschteu mit em Schissipapier läär isch. Aber ou über das würdi i mir sicher keiner grosse Gedanke mache.
I miechti mir keiner unnütze Sorge, dass viellicht in es paar Täg, no meh Gschteu läär chönnti si. I hätti kei Angscht vor däm was no aues chönnti uf üs zue cho oder wie sich dMönsche i so re Situatione verändere.
Es giengti mir de fasch wie denä glückliche Lüt, wo uf ere Insel gläbt hei und nid mitübercho, dass uf dr Wält dr Chrieg usbrochen isch.....
D'Angscht und dr Stress si üsi gröschte gsundheitliche Finde.....sie mache üs chrank.  Drum, mir zlieb, losen i nüme stündlich was i de Nachrichte brichtet wird und i lise ou nid jede Iitrag über dä Virus im FB.....Vogelstruuss?  Ja sicher.....mi Vogelstruusspolitik schadt niemerem und mir duet si guet.
Sötti mi dä Virus trotzdäm finde, je nu, de isch es haut e so und de sorgen i mi, wenn es würklich es Thema wird. I däm Sinn....häbet nech Sorg.......

Liebi.....

Vor nes paarne Täg bin i mit mire Fründin Sharon go zMittagässe. Mir kenne üs scho sit nünzäh Jahr und mir träffe üs jedi 2. Wuche  zum Lunch. I würdi säge, mir kenne üs rächt guet und drum rede mir ou über persönlechi Sache. Bim Ässe fragt sie mi: "wie mängi Person git es i dim Läbe, wo du zu ihre würdisch säge, I love you? oder i mire Sprach: I ha di gärn?"
Das isch eigentlich nid e komplizierti Frage...chönnti me meine. Aber i ha doch lang müesse überlegge und i bi zum Schluss cho, i mim Läbe git es fasch niemer won i das säge. D'Sharon luegt mi aa und seit: ja, für mi isch es grad glich...niemer! 
Jetz wärde sich die meischte säge: Ja aber wie truurig isch das, das cha me doch nid! Mo mou das cha me scho und truurig muess es überhoupt nid si.
I bi zu de meischte Wäse e liebevolle Mönsch, i luege gäng, dass es allne a nüt manglet und das es allne guet geit. Brucht öpper mini Hilf, de bin i gärn für se da. Das isch ou e Art Liebi won i läbe.....e fürsorglechi Liebi. De natürlich miner Tier....wie viu Liebi giben i mine Tier, für die machen i aues... und vo da, chunnt de äbe ou gäng öbis zrügg.
Aber die zwüschemönschlechi Liebi isch für mi gäng chlei schwierig gsi. Entweder het sie mi töiff verletzt, isch egoistisch gsi oder i ha aues gä und zrügg cho isch nüt. So han i glehrt, dass es für mi besser isch, wenn i guet zu mir säuber luege und mi lehre gärn ha. 
Ja i weiss, all die Familie mit ihrne Chind und Grosschind.....und so viu Liebi.....Aber das gilt haut nid für alli Mönsche glich. Wenn me das für sich cha akzeptiere, oder sogar cha säge: "das isch äbe mis Läbe und so isch es guet," de het me scho viu glehrt.

Ganz churz han i mir überleit, was ächt d'Läser vo mim Blog vo mir dänke, wenn i so öppis Schrybe? Aber ou um das, machen i mir nid gross Gedanke, denn,  jeder ist sich selbst der Nächste! I däm Sinn wünschen i euch ganz viel Liebi is Härz.....

E Gschicht us mim Buechprojekt....

Pousemilch

Zyte hei sich gänderet und gänderet hei sich ou d’Ässgwohnheite. Won i no i d’Schueu bi, si mir am Mittag heigloffe fürs z’Mittagässe, ou wenn mir e Schueuwäg vo guet zwänzg Minute gha hei. S’Velo hei nume die dörfe bruuche, wo wyt absyts gwohnt hei, oder vo ännet der Aare si cho. Me het sich nüt derby dänkt, so isch es eifach gsi. Dass eim d’Eutere i der Wält ume gschoffiert hätti, das wäri denn niemerem i Sinn cho.Het es grägnet het me e Pellerine aagleit oder e Schirm mitgno. Me isch denn äbe no ohni Händi umegloffe und het d’Händ frei gha für ne Schirm.Mis Muetti het kochet gha, wenn mir alli so um die viertelabzwölfi si Hei cho. Es het e eifachi Choscht gä und nid jede Tag Fleisch. Aber so isch es ou bi de meischte andere Familie gsi. Zum Voruus het es meischtens e Suppe gä und was süsch no als Menü isch uf e Tisch cho. Am Schluss het üse Vater gäng no es Gaffee wöue und nachdäm isch er de wieder mit em Velo nach Langethal gfahre, go schaffe.I ha de müesse häufe Abtröchne und so um die eis (Uhrzeit), bi ou i wieder i d’Schueu glüffe.Für ne Franke i der Wuche, hettes im Winter i der Schueu Pousemilch gä. Hüt giengti das auä nüme meh. Hüt isch scho fasch jedes zwöite Chind Laktoseintolerant und vo de junge Erwachsene ghört me, uf was für Sache sie aues allergisch sige.
Wenn me hützutags i de Schuele die Gleslimilch würdi aabiete, müessti sie auä Glutefrei und Veganisch si und wäge der Hygiene wott i gar nid afa. I weiss das isch jetz ender e Witz, aber wenn me so list und lost, han i zGfüehl, dass i mit däm Witz gar nid wyt awäg bi. Es isch doch hüt eifach modern, dass me heikku duet und viu Sache isst wo vo wyt här chöme, wiu sie gsünder sige als üsi Härdöpfu.Ou zu minere Schueuzyt hei viu Chind die Pousemilch nid gärn gha. Sie isch immer so lauwarm derhär cho. Aber i ha mi immer gfröit uf die Schoggimilch. I trinke ou hüt no gärn Milch i aune Temperature. Ou do drzue git es ja hüt Theorie wo säge, der Mönsch bruchi gar ke Milch. Bruche duet är se sehrwahrschynlich nid, aber das isch ja mit vielem e so. Mir ässe und trinke ja nid nume was mir unbedingt bruuche, oder?
Wenn i hie bi üs in Creston, (Kanada,) die Schüeler vo de obere Klasse gseh, wie sie am Mittag i der Pouse i fast food gö go Ässe, muess i mi scho frage. Jede Tag Hamburger, Pommes oder süsch öppis fritierts, derzue e süesse Drink…scho nume was das choschtet!Und was duet es für d’Gsundheit, d’Familie und ihres soziale Läbe? Zäme Ässe oder Choche isch doch enorm wichtig.Im Fernseh hei si einisch e Serie bracht, wo me genau das de Chind und de Jugendliche het wöue Ufzeige. Me het mit ne kochet und am Tisch gässe, so, dass sie chönne erläbe, wie gsunds Ässe chönnti schmöcke.I bi entsetzt gsi, dass zum Teil sogar d’Eutere vo denä Chind, no nie es Yoghurt gässe gha hei. Sie hei ke Ahnig gha was richtige Chäs isch und usser Rüebli und Härdöpfel hei sie meischtens gar kener Gmüessorte kennt, gschwige de gwüsst wie me se würdi Zuebereite.So isch ou nid verwunderlich, dass sie die meischte Sache gar nid gärn gha hei. Aues was nicht künschtlich aromatisiert oder gsüesst isch gsi, hei sie gruusig gfunde. Zum Teil hei sis sogar müesse erbräche, so het es se tschuderet.Aber es paar wo bi däm Experimänt mitgmacht hei, hei de am Schluss doch Freud am Choche und am gsunde Ässe übercho. Sie hei sich sogar vorgno, dass sie in Zuekunft ihrem Umfäld, chlei meh Beachtig wei schänke. Das heisst, der Tisch schön decke und viellicht nid immer nume vor em Fernseh öppis ineschoppe, äbe nid nume Fingerfood ässe.Für die Einte isch gsund Ässe e Läbesfilosofi und die andere si froh, dass es überhoupt jede Tag öppis uf e Tisch git.I choche immer no so, wien is glehrt ha...möglichscht das wo Regional wachst. Bym Iichoufe und Ässe duen i drufluege, wie was Aapflanzet worden isch und sFleisch choufe mir vom Dorfmetzger, wos Fleisch  vo de Farmer i dr Umgäbig iichouft.