Donnerstag, 20. Juli 2017

Morchle sueche......

Mi erscht Früehlig und Summer in Kanada uf üsem Bärg, het für mi ganz viu Nöis parat gha. I ha meh as 30 Jahr am Bielersee gwohnt und s'Läbe hie im Busch in Kanada, hätti nid ungerschiedlicher chönne si. I ha mängs glehrt bis hüt, bi ou mängem gägänüber chli glassener worde. Öppis möcht nech doch gärn verzeue.     


I ha äbe im erschte Früehlig, grad bi üs näbem Huus, drei Morchle gfunde. Mit däm han i überhaupt nicht grächnet gha. Natürlich han i mi sehr gfröit über dä Fund und überleit: "wenn's hie Morchle git, de gits sicher no meh uf üsem Grundstück." Nach em Mittag han i mis Chörbli gno und bi loszoge. Dr Hund --- mir hei denn nume d'Maite es Boxermitschi gha ---- han i extra deheime gla. I ha mi wöue uf d'Morchle konzentriere und nid immer luege wo mis Meitschi isch.
I ha gar nid so wyt müesse ga, bis i no meh vo däne begährte Piuze gfunde ha. Über jede einzelne han i mi gfreut und drby isch es gar nid immer eifach gsi, dür das Gschtrüpp und Baumstämm wo am Bode gläge si, düre z'cho.


Nach öppe 2 Stund im Busch umeloufe han i mir dänkt, jetz längts. I cha ja en andere Tag no einisch cho. So bin i zrügg uf e Wäg, wo zu üsem Huus gfüehrt het. Dört isch es so ruehig und friedlich gsi, dass i mis Chörbli abgsteut ha und uf ene Boumstamm ghocket bi. Die Stimmig han i chli wöue uf mi la würke.

 
Da, plötzlich chunnt es Reh zum Busch us, luegt chli ume und springt grad wyter.
I ha gar nid richtig Zyt gha zum Realisiere, chonnt us em gliche Busch wie vori  s'Reh, öppis angersch cho z'gumpe. Mi erscht Gedanke isch gsi: "Eh was macht de jetz d'Maite do? Ha se doch deheime gla?" Die vermeintlechi Maite nimmt e Satz über e Fäudwäg und mit emene elegante Sprung, hocket sie uf er Birke. Das si Bruchteile vo Sekunde und mis Hirni isch uf Hochtoure gloufe......das cha nid mini Maite si, Hüng hocke nid uf de Böim! Aber d'Grössi und d'Farb......oh jesses, das isch e Cougar (mir säge dene Berglöwe uf Dütsch)! Jetz isch mir aues i Sinn cho, won i gläse ha und was me mir verzeut het, was me macht, oder äbe nid macht, chunnt me Mou so ine Situation. I ha mis Chörbli gno, bi ganz langsam, langsam.... hingerschi gloufe......ganz langsam.....dr by het mir s'Härz bis i Hals ueche gschlage. Ersch dört wo dr Wäg e Biegig macht, han i trouet mi umzdräie und denn han i die Hingere vüregno. Ganz usser Atem bin i de bi üs deheime acho und i ha em Urs verzeut was mir passiert isch. Är het de gmeint: villicht duesch nächschts Mou dini Briue uf d'Nase. Aber die hätti mir i däm Momänt ou nüt gnützt. I ha de die Morchle la Morchle si und bi nüme ga sueche für meh.

Samstag, 15. Juli 2017

D'Frieda (Fortsetzig)

                                          Das isch d'Frieda, es Jakobschaf.

Die erschte Tage won I miner Alpakas gha ha, bi n i fliessig i Stau abe, go luege, öb aues ir ornig isch. Freud han i a dene Tier und guet söue sis ha bi mir.Während i Wasser ufgfüllt ha gsehn i, dass d'Frieda dr Chopf sänkt und d'
Tiffany vou i d'Syte boxet. Die het nume es lisligs Grummle vo sich gä und isch chli uf zyte. "He Frieda," han i brüelet....."wotsch ächt ufhöre"! D'Frieda het mir ke Beachtig gschänkt,  si het grad no einisch Alouf gno und wieder het die armi Tiffany eis verwütscht. Jetz längts! I ga i Stau und chume mit em Bäse bewaffnet zrügg. Langsam gan i uf d'Frieda zue.  Die scharret mit ihrem dünne Vorderbei, sänkt dr Chopf zum Agriff und luegt mi drbi hässig a. I ha eigentlich ä kes vo ihrne Hörner wöue gschpüre und ha drum afa sanft uf si yrede. D'Situation het sich e chli entspannt. Mir isch i Sinn cho was dr Werner gseit het über die Fründschaft:"sie si scho gäng zäme gsi, me sötti se nid trenne" Auso i bi jetz grad überhoupt nüme sicher gsi,  öb das es so isch. I has de am Urs verzeut und är het gmeint: Dr Nachbar, grad ännet dr Highway, heigi doch ou Schaf, viellicht würd är ja d'Frieda zu sich näh?

Üsi nächschte Nachbure si Mormone.....die wo meh as ei Frou hei. I drüne Hüser wohne vier Froue und öppis meh as zwänzg Chind. Für üs machts ke Unterschied, mir häufe üs gägesitig us und was für ne Gloube dass sie läbe, söu nid üsi Sach si. I möchti das hie eifach nume zur Information schribe. Dr Kevin, s'Oberhoupt vo däm Clan het em Urs gseit, är chämi de am Abe einisch übere zu üs, das Schaf cho aluege.
So isches de äbä cho........dr Kevin isch mit zwe vo sine Jünglinge, mit em Pick up Truck cho d'Frieda aluege. Är isch beidruckt gsi vo dene Hörner und het gmeint; mo mou, so nes Schaf würdi är gärn zue sich näh. Auso los Giele.....lade mir das Schäfli uf!
I ha mi chli zrügg zoge und zuegluegt wie die drei, nei vier Manne, probiert hei, dr Frieda dr Wäg abzschnide. Kene vo dene junge Giele het dr Mum gha, d'Frieda bi de Hörner z'packe. Sie het die Manne in schacht ghaute, het gscharret und dr Chopf zum Agriff gsänkt.


Jetz het dr Urs en Idee gha:"probiere mrs doch  einisch mit chli Chörnli,!
Für die gingti d'Friede wyt. Genau so isches gsi. Wo sie dr Sack het ghöre raschle und s'Täuer gseh het, isch sie grad zum Urs cho und het afa frässe. Sie het sich la e Chauberstrick ume Hals legge und de heis sie s'Frieda chönne uf Truck uflade. I ha süsch immer müeh mit Abschied näh, aber das mou isch es mir ring gange.
Vo denn a hets Rueh gä, bi dene zwöine Meitschi. Jetz han i gseh, dass sie gärn gläge si und mit gschlossne Ouge wiederköiet hei. De Entscheid isch richtig gsi, D'Frieda het sich bim Kevin sine Schaf ygläbt und aues isch guet worde......

Mittwoch, 12. Juli 2017

Miner Alpakas......

I verzeue nech jetz, wien I zu mine Alpakas bi cho.
Dr Urs mi Maa, zettlet gärn Sachen a und I muess se de später usbade. So isches ou mit üsne Alpakas gsi. Dr Urs isch vom Dorf hei cho und het mir verzeut, dass är bim Metzger dr Werner troffe heigi. Dr Werner isch en eutere Schwizer, wo denn im Nachbardorf gwohnt het, und jetz am zügle isch gsi. Är gängi nach Alberta zu sine Sühn, het är am Urs brichtet. Aber jetz heig är äbe no es Problem, är heigi  zwöi Alpakas und är wüssi gar nid wohi mit dene. Dr Urs, spontan wien är isch, bietet em Werner grad e Lösig a: E, mis Ursi het scho mängisch gseit, äs hätti gärn es paar Tier. I rede mit mire Frou und hinech duen i dr de Bricht gä.
Jetz han i auso müesse drüber nachedänke, öb i zwöi Alpaka wetti zue mir näh. "Chame die Tier mou ga aluege?" han i dr Urs gfrogt. Und uskenne duen i mi de überhoupt nid, mit dene Chlikameu......wirde de müesse Google!
Mir si auso no am gliche Tag zum Werner gfahre, damit i die zwöi Tierli mou ha chönne aaluege. Sie si uf dere chline Weid gsi und hei graset. "Je und was isch de s'Dritte? Für mi gseht das us wien es Schaf?" Dr Werner het mir erklärt, das sigi es Jakobsschaf und es sigi äbe gäng mit dene zwöine Alpaka Meitschi zäme gsi....me sött's se nid trenne. Aha......ja well.....so nes Schaf wird jetz wou nid aui Wäut frässe und Platz wird sich de o no grad irgendwie finde. Zu däm Zitpunkt hei mir aber weder e Stau gha no e Izüüneti Weid. Aber hie in Kanada seit meh gärn: No Problem!
I ha em Werner zuegseit, dass i die drü nämi, wenn är üs gnue Zyt gäbi,  dass mir chönne e Understand für die Tier boue. Dr Urs und i si hei gfahre und hei grad agfange mit Boue. Jetz han i mi richtig gfröit uf die Tier.
 

Mir si no nid fertig gsi mit däm Unterstand oder Stau, wo dr Werner telefoniert und seit: "Sit dir nache? Mi Suhn chunnt mi morn am Namittag cho reiche und de müesse die Tier wäg si." I bi churz igschnappet, aber das het jetz o nüt abtreit. Dr Werner het mi Hiuf brucht, für die Tier ine chline Ahänger z'Verlade. Bi däm Manöver han i de gmerkt, dass die Meitschi nid so reagiere, wien i das erwartet ha. "I ha gmeint sie sige zahm?" sägen i zum Werner. "Nei, nid würklich. Weisch i ha mi nid gross kümmeret. Ha se gfuetteret, aber süsch.....muesch haut de luege wie de z'schlag chunsch. " Ja merci schön.....das han i nume dänkt und mir hei mit Müeh und Not die Tier i de Ahänger buggsiert. Für die 45 Kilometer wird's scho ga. Wo mir bi üs deheime si acho,  isch es fruschtriert schwarzes und es ufgregts wisses Alpaka zu däm Ahänger use gschtakst. S'Schaf isch richtig hässig gsi und het das ou zeigt. Dr Werner isch wieder hei zue und het üs mit dere Schar allei gla.

Auso, aus erschts müesse jetz die Meitschi e Name ha. Zu dr wiude Schwarze säge mir Aisha, die stoutzi Wissi heisst jetzt Tiffany und die Hässigi rüefe mir ab jetzt Frieda! Z'friede han i miner Schützlinge agluegt..... ha se scho i mis Härz gschlosse gha.
Jetz hei mir ou gseh, dass sich würklich scho lenger niemer meh um die Tier kümmeret gha het. Vou vo Distelchöpf isch ihri Wulle gsi. Die arme Tier hei nid emou meh richtig chönne dr Chopf abe ha.

Nach es paar Tag hei dr Urs und i agfange und die Distlechöpf,  wo richtigi Chnüpple gä gha hei, mit ere Schäri usezschnide. Tiffany, het schön häre gha aber d'Aisha het bääget wie am Spiess und gsabbert. Agschpöit het sie üs nid, aber de grüen, stinkig Sabber isch eim über d'Häng und d'Hosebei glüffe. Aues het nüt gnützt, das het jetzt eifach müesse si.
So, das gseht doch scho ganz ordeli us......schön si sie, miner zwöi!

Nach es paar Monet si s'Aisha und s'Tiffany ganz zuetroulich gsi und si uf mis Rüefe cho ihres Gudi am Zuun abhole. Für nes Rüebli und chli Salat geit ou es chlises Kamel meilenweit ;-).

Warum s'Schaf Frieda nüme uf dr Foto isch? Das chöit dir ire Fortsetzig läse.....

Samstag, 8. Juli 2017

Aromat und angeri Sache




was duet e Schwizer uf d'Tomate und uf d'Eier? Mit was würzt är nache, wenn's nid grad so schmöckt, wien är's gärn het? Was steit i fasch jedere Beiz uf em Tisch und das nid nume ar Oschtere? Jawollll, AROMAT!
Dass das Züg eim so wichtig isch, merkt me erscht, wenn mes nümme het und niene meh cha choufe. De chan es zum ne ächte Problem wärde......auso verhäutnismässig!
Die erschte paar Monet, won i bi in Kanada gsi, het mes no i üsem Superstore chönne choufe. De plötzlich isch es us em Gschtell verschwunde gsi! Oha, jetz het d'Suechi und s'Umefrage agfange. D'Schwizer (us Creston) hei sich ungere nang usghoufe und wenn öpper irgendwo die Aromatbüchsli entdeckt het, de het är grad es paari kouft.....sicherheitshauber. U sit denn, planen i miner 2tägige Usflüg -- won i im Sommer öppe mache, -- e so, dass i uf em Rückwäg bi mene Lade verbichume, wo me Europäischi Sache cha choufe. Die Läde kenne mir Schwizer im Umkreis vo 1000 Kilometer jede. :-)
Es isch nämlich wien e Bsuech im Schlaraffe Land. Was me do nid aues fingt. Au die gluschtige Sache, Züg wo me scho lang nüme gseh und gässe het. Zwüschiche fahren i genau wäge däm nach Canmore Alberta (rund 400km ein Weg). Dört git's e Schwizer Metzger wo ganz e hufe Sache duet importiere. Wenn är de het, choufen i Appezäller Chäs, Bündnerfleisch, Kalbsbratwürscht, Toggeburgerli und Kägi Fret und Ragusa und äbe, Aromat ir Kilobüchse!  Me cha die Sache fasch vergoude.....vom Pris här. Aber wie seit me so schön: man gönnt sich ja sonst nichts!
Es chunnt scho chli  druf a, wo me läbt in Kanada. I de grössere Stedt, überchunnt me die War ender, als hie uf em Land won i wohne.
Aber das isch eigentlich glich, so han i gäng e Grund zum e chli go z'Vagante!

Bim Coiffeur

I dr Schwiz bin i jahrelang gäng zur gliche Coiffeuse gange.  Me het sich kennt und sie het gwüsst was i nid wott: nämlich z'churzi Haar! De bin i 20001 nach Kanada cho und irgend einisch is das Thema  nach emene Haarschnitt aktuell worde. Irgendwie han i mi nid so rächt trouet, mis Änglisch isch denn nämlich no ziemlich mangelhaft gsi.  Je nu, wenn i miner Haar nid säuber wott schnide, de muess es jetz eifach si. I bi nach Creston gfahre,  üses Dorf wo mir iichoufe, zum Dokter gö und äbe ou zum Coiffeur. Dört bin ig i erscht Haar Salon, wo a dr Houptstrass offe gha het. I ha mir vorgschteut, dass i zerscht müessti es Appointment mache. Aber nei, die jungi Frou wo mi empfange het, luegt i ihres Buech und seit; wenn dir Zyt heit, de chöit dir grad hie Platz näh......natürlich het sis uf Änglisch gseit! I ha uf däm Dräistuehl Platz gno, sie leit mir es Frottetuech um d'Schultere und wott mit ere Sprützfläsche miner Haar nass mache. I ha abgwehrt und gfragt, öb sie würdi d'Haar richig wäsche? Ja klar, het die jungi Frou gmeint. Het die Wasserfläsche zrügg gschteut und mir z'verstah gä, de müessi bi de Wäschbecki Platz näh, was i gmacht ha. I dr Schwiz het me mi aube gfragt: was für nes Shampoo möchtit dir gärn? Das het die jungi Frou nid gmacht. Drfür han i so ne tolli Chopfmassage übercho, dass i fasch igschlafe wär. Sie het es Frottetuech um miner Haar drapiert und i ha wieder im Dräistuehl vor em Spiegu dörfe Platz näh. Sie seit zu mir; d'Lena isch jede Momänt da. D'Lena isch d'Chefin vom Salon gsi und het miner Haar gschnitte. Jetz hätti mini Coiffeuse i dr Schwiz gfragt: hättit dir gärn es Cafè? Hie isch niemer uf so ne Idee cho und drum han i Zyt gha, chli umezluege i däm chline, aber härzige Salon. A de Wänd sie Biuder vo Frouchöpf ghanget mit wunderschöne, kunschtvolle Frisure. Grad näbem Igang isch e Chorbstuehl und es Tischli gschtande, mit emene Bigeli Heftli. Ou die obligate Frisurebüecher si usgleit gsi. Näbe dranne isch es Gschtell mit dr Kasse gsi und a dr Wand hets  es Tablar mit Haarprodukt gha.
Jetz isch d'Lena cho und het mi gfragt, was mir de hüt machi? I ha i mim Änglisch ihre probiert z'erkläre, dass si doch eifach miner Haar söu schnide.....eifach nid z'churz! Das han i öppe drü mou gseit. Das isch natürlich e wyte Begriff gsi, wenn i das Foto mit dere Raspelchurze Frisur näbem Spiegu agluegt ha.
Es het usgseh, wie wenn d'Lena exakt würdi wüsse, was i möchti. Wie ou immer, sie het agfange schnide und zwar i mene Tämpo, dass i nume no gschtuunet ha. Einisch han i ganz liseli gseit......not too short please!! D'Lena het mir versicheret, dass es scho guet chunnt und i ha mi ihrer Schnippelei überlah.
Nach grad mou 8 Minute isch si fertig gis und het a minere --- immer no füechte --- Fisur umezupft und gmeint, auso ihre gfau is. I hingäge bi nid so überzügt gsi vo mire nöie Frisur. Plötzlich fragt si mi, öb si miner Haar viellicht no söui Föhne und mit dr Bürschte chli "style"? I ha dänkt, das wäri säubschtverständlich, aber hie gö viu Froue mit füechte Haar hei und föhne se säuber. I ha de dä speziell Service i Aspruch gno, aber d'Haar si ou dürs Föhne nid lenger worde. Je nu, sie wachse ja nache und es git no öppe siebe anderi Coiffeure a dr Houptschtross in Creston!

Freitag, 7. Juli 2017

es chlises Stinktier



Das Bild ist nicht von mir!

Vor zwe Tag, oder besser vor zwe Nächt, han i e härzegi Begägnig gha. I üsem chline Schöpfli hingerem Huus, han i e Faue für Ratte ufgsteut gha. Es isch e Faue wo Tier nid töt, sie si nume igsperrt und müesse de warte bis öpper chunnt und se nöime angersch uselaht. U jetz äbe vor zwe Nächt, han i am Morge am haubi vieri öppis ghöre räble. Sofort han i dänkt; oha, da isch äuä ä Ratte i d'Faue trappet. I ha mi im Bett umdräit und dänkt: die drei Stung bis i ufstah, cha sie jetze warte, jetz stan i nid extra uf. Wöu die Viecher wärde de vo mir an es angersch Örtli gfahre und dört chöisi de aube wieder i d'Freitheit. So han i probiert wieder izschlafe. Aber das Gräbu het u het nid ufghört, im Gägeteil, es isch immer heftiger worde und a witerschlafe ich nüme z'dänke gsi. Widerwillig bin i de haut doch i d'Hose und es paar Schlarpe gschlüffe und bi mit dr Taschelampe - dusse isch es immer no stockdunku gsi-  ums Huus ume is Schöpfli ga luege, was de ömu ou so e Krach macht. De han is gseh! Statt äre Ratte, isch äs jungs Stinktier i dr Faue ghocket. Es het grad knapp Platz gha. Das chline Tierli het sich weder chönne dräie  no  hingerschi usegah. D'Faue isch zue gsi und dä chli Wicht gfange. Stinktier hei äbe dä Köder wo i dr Faue isch gsi, o gärn. We das es usgwachsnigs Stinktier wäri gsi, de hättis jetz im Schöpfli mordio gschtunke. Muetig han i mi a Bode knöilet und ha däm chline Stinker i d'Auge gluegt. I ha zuenim gseit; gäu, wenn i di jetze uselah, de geisch tifig e wäg, dräisch di ja nid um und due mi nid aschprütze? So sicher bin i däre Sach de äbe doch nid gsi. Aber i hane doch nid eifach chönne igsperrt lah si. Do isch öppis passiert, was mir sehr grüehrt het. Das chline Stinkerli streckt sis Vorderfüessli zwüsche de Gitter düre use, wie wenn äs wetti säge: so mach de öppe.....i verspriche, dass i grad vertube. I ha vorsichtig dr Schieber vo dr Faue ufta und dä Chli isch hingerschi us dr Faue grütscht. Sekundelang isch är dört ghocket und het mi agluegt. De isch är uf und drvo wies Bisiwätter. Wieder einisch bin i glücklich gsi, dass i Läbendfaue brucht ha.
I muess hie no säge, üsi Ratte gseh eigentlich schön us,  nid so wie die wo me in Europa het.  Sie hei e buschige Schwanz und heisse hie Pack Rats.
Hie isch no es Foto vo einere won i gfange und umgsidlet ha.


u blibet gäng wie dr sit.....

  I weiss nid wie dier da drüber dänkit....aber mi het de Spruch vo Hüt am Morge dr ganz Tag beschäftiget. Im Musigwälle Wunschkonzärt het e...