e grossi Schachtle Caran d'Ache.....

D'Wiehnachte isch verby, Gschänkli si uspackt und scho gli wird ou s'Böimli abgruumet. So isch es haut. Wo mir das Jahr so zämeghocket si und vo früecher verzeut hei, da isch mir o wieder i Sinn cho, was i mir als Chind immer gwünscht ha. Mi gröscht Härzenswunsch wäri es Ross gsi.....es richtigs! Dass dä Wunsch auwä nie wird in Erfüllig ga, das ha sogar i begriffe, ou wenn i no chliner bi gsi. Aber de han i äbe no en angere, grosse Wunsch gha; eine wo nid minger wichtig wäri gsi; e vierzger Farbschachtle vo de Caran'Dache.

So ne Schachtle Farbstifte han i Mou im Schaufänschter bim Löeb z'Bärn gseh gha. I hätti stundelang chönne vor däm Fänschter stah und zueluege wie die Igeli sich zwüsche denä uusgschteute Farbschachtle dräie.  Es het mi de düecht, äs gäbti nüt schöners, als äbe so ne grossi Schachtle vou Farbe. All die Farbschattierige, sogar Gold und Silber het es drinne gha.

Jedes Jahr han i  miner zwe Wünsch uf ene Wunschzettu gschribe, mit der Hoffnig, dass irgendöpper da Obe, de Zettu duet läse und viellicht....irgendeinisch.....wär weiss....

Aber jedes Jahr, isch öppis anders für mi unger em Böimli gläge....öppis wo me ou cha bruuche! Das het zmingscht mini Muetter gmeint.

He ja, wär brucht scho vierzg Farbstifte, wenn no so mängs angers aasteit? 

I hätti mir ja später mi Wunsch säuber chönne erfülle....warum han is nie gmacht? Statt derä Farbschachtle, han i mir de vor nes paarne Jahr Ölfarbe, Pinsel und Lynwänd kouft. Wo de all die wunderbare Malutensilie vor mir uf em Tisch gläge si, han i mit mir säuber und däm Wunsch chönne Friede schliesse......

E Läbchueche

Ändi 60zger Jahr, han i i dr Bäckerei Nyfeler - Bigler z'Langethal, e Verkäuferinne Lehr gmacht. I ha nid nume i däm chline Biglerlädeli verchouft, sondern i ha ou viu i dr Bachstube dörfe häufe. Äbe ou vor Wiehnachte, wenn all die Läbchueche hei müesse mit Zuckerglasur verziehrt wärde. Geduldig han i am "Vater Bigler" ghoufe Bläch um Bläch die chline u grosse Läbchueche z'schmücke. I ha das sehr gärn gmacht und i bi mir fasch chlei vorcho, wie bim Samichlaus Deheime am Nordpol.....oder verwächsleni jetz öppis?

Item, vor zwöine Jahr han i de einisch d'Wäbsyte vo dr Bäckerei Reinhard z'Bärn aaklickt und chlei gläse was si so aues im Angebot hei. Sie täte o verschicke heisst es da. eifach Schwiz- und Europawyt.

Die dunkelbruune, schön glänzige und so kunschtvoll verziehrte Läbchueche, hei mir richtig Heiweh gä....nach derä Zyt, wo scho so lang zrügg liggt.

Und us däm Grund han i eifach Mou es E-Mail a d'Bäckerei Reihnhard gschrybe und gfragt, öb sie de nid --- usnahmswys --- doch so ne schöne Bärnerläbchueche würde nach Kanada schicke? Der Verchoufleiter het mir de grad säuber zrügg gschribe.....es fröii ihn, mir e Läbchueche z'schicke. Eh klar mache mir doch das.....

Mir hei no es paar Mal hin und här gschribe und de isch das Päckli cho.......

Überglücklich und mit grossem Gnuss han i de dä Läbchueche gässe......gäng ume es Bitzeli.....

 Das Jahr han i wieder gschribe i dBäckerei Reihnhard, öb sie ächt nid no einisch würde......

Dr glich nätt Maa, dä Thomas, het mir ganz härzlich zrügg gschribe, dass es ihn fröii vo mir zläse. Dass i wieder nach eme Läbchueche fragi, das sig es guets Zeiche und fröii ihn ou......und natürlich würde sie mir sehr gärn wieder e Bär schicke.....

Mi het die liebi Antwort und das i nid vergässe worde bi, genau so gfröit wie jetz de wunderschön Läbchueche, won i vor nes paar Tag uf dr Poscht ha übercho.

De Läbchuecheduft bringt mir alti Erinnerige zrügg und i bi dankbar, dass i mir aube einisch so nes Gschänkli cha mache......schöni Adventszyt euch allne.....

Romantisch....

Wär kennt se nid die wunderschöne, romantische Lieder wo Froue mit klangvolle Näme....... besinge......
Mo-ooonia.....Ramona......Rosmarie......Monika.....Adelheid und so wyter.
Nume vo dr Ursula han i eigentlich no nie es Lied ghört und mit Uschi muess me mir gar nid cho. Wenn mir öpper het aafa Uschi säge, han i grad iigriffe und gseit; I bi sUrsi oder dUrsula. Hüt am Morge het dr Urs gseit, dass im Radio, im Wünsch dir was uf dr Musigwälle, es Lied vo dr Ursula sigi cho. Är hets im Internet gsuecht und s'mir de vorgschpiut. Do singt e Chinderstimm --- mit Näbegrüüsch, es isch e alti Platte!) dass äs (s Chind) gärn es Schwöschterli hätti, eine kleine Ursula! Aha......
Und ab auem Sueche, findet dr Urs grad no eis Lied über d'Ursula.....die Raupe Ursula, die nimmersatte!!
Auso wo isch jetz do d'Romantik...... äbe, Ursula isch haut öppe glich romantisch wien e Bär us Holz! :-)

jetz stinkts mir de langsam!!

Auso eigentlich bin i by denä Mönsche wo mi kenne, als Tierfründ bekannt. I bi öpper wo luegt, dass es aune guet geit, dass ja niemer vergässe wird. Aber jetz längts mir de gli, so chan es nüme wytergaa.
Die letschte Mönet han i i üsem Wohnwage gschlafe.....wöu mir düe umboue.....und i ha mi Rueh gha, was i sehr gnosse ha. Aubeeinisch brucht me eifach chlei Rückzug.

Won i der Pax no gha ha, bin i mängisch 4x i dr Nacht ufgstande um ihn zberuhige, wöu är
sy "Wachhundjob" z'ärnscht gno het. Wenn ig ihm de aube gseit ha: "good  boy, jetz isch wieder guet," de isch für ihn dr Job done gsi und er het wieder uf sim Chüssi platz gmacht ..... bis zum nächschte Grüüsch wo ihn nid normal dünkt het. Es het Nächt gä, do het är de eifach müesse inecho, de het är düregschlafe.....und ig ou. Wird me euter, de ma me so stündlechi Schlafunterbrüch eifach nüme so verchrafte -- ömu mir hänke si aa.

Wie gseit, die letschte Monate han i mini Rueh gha, kener Hünd, kener Chatze, i ha gschlafe wien es Herrgöttli und es het mir richtig guet da.

Chum schlafen i jetz wieder im Huus, geit's wieder los. Der Kater Beni chunnt Nacht für Nacht und wott öppis vo mir. Wenn i is Bett ga, schlaft är ir Stube i sim Chüssi und macht ke Wank, dass är jetz wetti ufstah oder usegoh. Chum bin i iigschlafe, mauets näbe mim Chopf und dr Beni wott use. So einisch ufstah macht mir nüt us und i cha schnäu wieder iischlafe. Aber äbe, es blybt nid bi däm einte Mou. Nach ere Stund duet dr Urs am Beni wieder Türen uf und är chunnt schnuerschtracks zu mir, chrauet am Teppich oder uf minere Dechi, so dass i erwache. Dr Mössiö hätti gärn chlei öppis angers i sis Gschirrli.....das wo no drinne isch passt ihm anschiinend nid. Z'mitz i der Nacht fuettere i prinzipiell niemer, ou nid dr Kater Beni.
Är git e Momänt Rueh, schlürmt dürs ganze Huus und macht die beide alte Chatze Esther und Nemo verruckt. Irgendeinisch schlafen i wieder ii. 
Aber e halb Stund später, der Beni probierts wieder. Jetz wirden i hässig, nime dä Büssu ungerä Arm und är muess wieder use. Im Sommer isch är z'Nacht gäng dusse, aber sobalds äbe chaut wird, isch er o lieber a dr Wärme.
Nach ere Wuche Chatzeterror han i zum Urs gseit, so jetz längts mir. I ma doch nid 3-4 Mou i der Nacht ufstah, nume wöues derä Chatz längwyilig isch. I rege mi de so uf, dass i gar nüme cha iischlafe. Geschter han i s'Powerhuus chatzefründlich iigrichtet......e Chorbstuehl mit Chüssi, es Chörbli mit Heu, Wasser und es Täuerli mit Chrübeli. Das Powerhuus isch gheizt, wäge üsem Wasser wo dört zum Bode uus chunnt und vo dört zum Huus ufepumpet wird. 
Auso geschter han i am Beni 2-3 x zeigt wie me dürs Chatzetürli ii und uus geit und jetz muess är z'Nacht dört nächtige, nüm im Huus. Är isch nid iibschlosse, är cha ine und use wien är wott, nume is Huus chunt är zNacht nüme!

Haas oder Chüngel?

Hüt hei der Urs und i dusse Gschaffet.....auerlei isch blibe si, wöu mir gäng am Huus mache.
Aber hüt hettes jetz eifach passt. 
Obschon überall es cheibe Kniepp und e Dräck isch. Mir hei haut Naturbode und wenn es gäng wieder rägnet, wird der Lehmbode eifach "madig," Drum het der Urs chlei Chiis verteut uf der Iifahrtstrass.
E nu......mir hei üsi Sach glich chönne mache. D'Chica isch mir gäng hingernache gloffe, bis sie uf einisch drvo rennt. I dräije mi um und gseh, wien e Haas vor ihre här rennt.
I ha d'Chica zrügg grüeft und dänkt, dass de Haas längscht über alli Bärge isch. Aber d'Chica het ke Rueh gä, jetz het sie usem Schopf usebäuet und i ha müesse ga luege.
I bi no nid im Schopf inne gsi, hanis ghöre Chlopfe.....aha.....das mache Hase oder Chüngle wenn sie gschtresst si, sie chlopfe mit de Hinterlöif a Bode.
I ga ine und gseh d'Chica vor eme Gschteu stah und e länge Hals mache. I luege chlei gneuer und gseh de Haas i de Sagspöön hocke.

Auso das het mi jetz doch komisch dünkt. Scho so mängisch han i e Haas gseh, mir hei tonnewiis uf üsem Bärg und immer hei sie sofort d'Flucht ergriffe, wenn sie mi hei ghöre cho.
Auso dass jetz eine i Schopf ine chunnt und nid emou drvo rennt wenn i vor ihm stah, das isch doch eigenartig.
I ga zrügg zum Huus und nime es Rüebli und Kamera mit mir und ga wieder zum Schopf abe.
D'Chica han i im Huus gla, i ha das Tierli ja nid no meh wöue stresse. Won i mit mim Rüebli und der Kamera zrügg chome, hocket er immer no am glichen Ort. I han ihm s'Rüebli häregleit und är het grad dranne gschnupperet und afa Frässe. Nei, jetz bin i sicher, DAS isch ke wilde Haas, das isch e Chüngu! 

Wieder bin i zrügg zum Huus.....der Schopf isch viellicht 150m vom Huus awäg......und ha der Marion, üsere neue Nachbarin aaglütet. Sie hei nämlich Chüngle mitbracht, wo sie uf eis vo üsne Grundstück züglet si.
Sie isch grad ga luege und het de gseit: "Oh ja, one is missing!" De muess dä di Usrisser si! 
Der Kirk, der Marion ihre Maa isch de cho und het das Tierli ohni Prloblem wieder chönne Heinäh.....dä isch nämlich immer no mit em Rüebli beschäftiget gsi! :-)

Eh bin i froh gsi, dass mir dä Chüngu gfunde hei. Är wäri de für d'Kojoties e liechti Beute gsi.

Näp Wiid und miner Gedanke drzue.....

Sit es paarne Jahr wachst uf üsem Bärg e Planze, wo hie eifach ungerem Name Knap Weed (Näp Wiid usgschproche) bekannt isch. Ihre Latinisch Name isch Centaurea Nigra und uf Dütsch seit me ou Schwarze Flockenblumge. In BC isch sie gar nid beliebt, me seit sie sigi vo Europa nach British Columbia, Kanada, iigschleipft worde. D'Tier frässese nid und wo sie wachst, da nimmt sie de andere Pflanze der Bode ewäg. Sie isch taff, vertreit d'Nessi wie d'Hitz und ou Tröchni macht ihre nüt us. Me het probiert die Pflanze wieder loszwerde, het se usgrisse, gmäit und isch sogar mit grobem Gschütz uufgfahre und het se gschprützt. Nüt het gnütz, oder nume für churzi Zyt. Jetz isch wieder da, das Näp Wiid.....meh als vorhär.

Geschter won i mit mine Hundemeitschi bi ga loufe han i die Näp Wiid Blueme mou so richtig aagluegt. Die filigrane Blüete si es richtigs Kunschtwärch und ihri Farb isch vomene wunderschöne, zarte Lila.

D'Schmätterlinge, Bienli und ou die andere Insekte hei se aanschinend sehr gärn. Wenn me dür nes Fäld mit denä Blueme louft, verströme sie e ziemlich starche, würzige Duft und sie wärde bis 80cm höch.

I ha mir de überleit, dass es nid nume i der Natur so funktioniert, sondern ou bi üs Mönsche. 
Ou mir chöi üs gägesytig der Bode ewäg nä.......
Vereinzelt si die Blume wunderschön und sie mache üse Garte intressant. Me cha se irgendwie integriere, wenn me derzue luegt und se unter Kontrolle het.  Breitet sie sich aber zfescht und unkontrolliert us, de git es zletscht nume no Näp Weed, und de isch de schwär, derä filigrane Blueme wieder Herr zwärde und Natur chunnt us der Balance........

Mi Seelenahrig.......

Immer im Früehlig wenn d'Natur aafat grüene, de überchumen i es Risse. Immer denn wenn der Himmel blau isch und i die erschti Wärmi gschpüre.....de muess i eifach uf und der vo.
Es brucht nid 3 Wuche Hawaii um mi wieder is Glöis zrügg zbringe. So ne 2-3 tägige Usflug i d'Rockies länge total, um mi glücklich zmache.
Wenn me das Foto vom Lake Louise aaluegt, de verschteit me doch was i meine, oder?
Im Früehlig isch es eifach sSchönschte,  e chlei usega, es Fährtli mache.....nöime härehocke und lose was da i derä Stilli abgeit. DAS isch was i als Seelenahrig bruche. 

Die hingerdüre Strässli näh, so dass me cha mit 30 km dür d'Gägend schnäggle und halte wenn immer mes brucht. I bi scho Ewigkeite ungerwägs gsi und niemer isch mir ebcho und Handyempfang het me grad o nid gha! Däm sägen i Läbesqualität.....
I wünsche euch allne, dass dir öji Seelenahrig ou chöit finde und schicke ganz härzlechi Grüess i die wunderschöni Wält use!

Eifach so zum Säge......

Wo chiemte mer hi,  wenn alli gäng nume seiti; 

wo chiemte mer hi und  niemer giengti einisch ga luege wohi dass me chiem  we me gieng. 

vom Kurt Marti

Drum bin i de gange und das han i jetz dervo! 

Vor 19 Jahr im April, bin i vom Seeland (Nidau) nach British Columbia (Canada) cho und blibe. I bi allei usgwanderet, zum äne Maa won i nume vom Internet und vom Telefoniere här kennt ha. Der Urs het scho syt 1979 in Kanada gläbt und isch als junge Maa usgwanderet. Er isch meh Kanadier als Schwyzer, das han i de schnäu gmerkt. Öb i die Gschicht einisch bereut ha? Nei, i bi überzügt, das het so müesse si. Aber eifach isch es deswäge de glich nid gsi. 

Über miner erschte 14 Jahr in Kanada han i es Buech gschribe.......und im Momänt bin i anere Fortsetzig. 
Dä Link bringt euch uf mi Buechsyte wo dir chlei meh chöit Erfahre........

http://kanada-auswanderungsgeschichte.blogspot.com/

Das Buech "Kanada ist Bärenstark" isch zwar uf hochdütsch gschribe, aber das söu ke Nachteil sy, das si ja die meischte Büecher, drum lehre mir Schwyzer ja äbe ou Hochdütsch!!

Däseli Zyt, Mopper Zyt.........

Uf em Wägli vor em Huus, geit -- nach es paar sunnige, mildere Täge -- der Schnee langsam wäg. Vüre chunnt e madige, nasse Bode.
Miner föif Vierbeiner gniesse das sonnige Wätter ou, und chöme ständig ine und use.

Dür die ganzi Chuchi düre gseht me jetz die viele chline und grosse Däseli.......es git es richtigs Wägli.
I nime der Chübu mit em Mopper vüre und fülle heisses Wasser und chlei Putzmittel dri und steues am Chuchi Iigang ab. Jedesmal wenn es wieder däselet, de nimeni dä Mopper und fahre zwöi, drü Mal übere Chuchibode. Das isch doch eifacher und vorallem lisliger, als immer z'Schimpfe oder eifach d'Türe zue zdue, so dass niemer meh ine und use cha! Die Situation duret jetz es paar Wuche, bis haut der Schnee ewäg und der Bode trochen isch.
Aha, und de wirds de besser? Chunnt druf aa.....wenns rägnet nid und wenns troche blibt, git es de haut stoubegi Däseli.....vo de Vier- und de Zwöibeiner. Bi üs gseht me haut gäng, dass da öpper i und us geit.....das isch, wien es isch......

s'Müetti als Cliche.....

Das isch jetz viellicht e chlei e komischi Über- oder Usleggig won i zu däne Müetti's ha oder mir mache.
Aber mir isch ufgfalle, dass i allne däne Lieder wo über  Müettere gsunge wärde, so nes Cliche herrscht. Die besungene Froue läbe alli muettergottseele allei im hingerschte Chrache, imene chlyne, schieche Hüsli. Sie hei schynbar ke Läbesqualität meh, wüu jetz ihri Chind uszoge si. Truurig, grauhaarig die verschaffne Händ im Schoss, hocke sie eifach nume no am Fänschter und warte......Oh jesses......würklich?

Isch das das Müetti wo besunge wird, i viele vo däne Lieder?

Die Froue hei aanschynend nume s'Läbelang krampfet, mängs Chind gha und nie öppis für sich säuber da..... 

Jetz hocke sie allei am Fänschter und warte druf, das ihri Chind hei chöme......

Das isch auso s'Bild vo nere (guete) Muetter.....mmmmm.....was si de all die aktive Grossmüettere wo zu de Grosschind luege? Wo inere Wandergruppe si? Sich mit volontär Arbeit iisetzte? Sie das die andere Müettere? Wo genau ghöre de die hi?

Gueti Müettere die si irgend einisch abekrampfet und truurig und vorallem, die wandere nid nach Kanada us....ou wenn sie Spinne!!!  :-)

Das Foto isch scho chlei euter......ha scho früech a fa mit Spinne!!

Der Beni isch es Monschter!

Der Beni....wenn er schlaft chan är kes Wässerli drüebe.....

I ha scho meh über üse Beni gschribe. Der Beni isch dä Kater, wo üs vor öppe emene Jahr zuegloffen isch. Syt Juni 2018 --- wo är isch kaschtriert worde --- isch er jetzt offiziel es Familiemitglied. 
Us däm chline Bueb, isch jetz e starche, sälbschtbewusste Kater worde und äbe ou es chlises Monschter. Er jagt aues was sich bewegt.....Eichhörnli, Müüs, Streifehörnli und vorallem isch er hinger de Vögeli nache. Was ig ihn eis wägg jage.....nützt aues nüt. Der Beni hocket sogar is Vogelhüsli ine....es isch scho ganz schiech.

Da steit es no grad uf Stamm.......

Hüt am Morge, won i der Beni öppe zum 3. Mal ha usem Hüsli gjagt gha --- i due ne mit Schneeballe verjage --- han i zu mir gseit; "so jetz längst mir". Jetz muess i  zu härtere Massnahme gryfe. I ha es Chübeli Wasser parat gmacht um de schnäu chönne z'reagiere, wenn de Bueb wieder im Vogelhüsi hocket. Es isch gar nid lang gange, seit der Urs;"Der Beni isch de wieder dinne!" I nime das Chübeli mit em Wasser, renne use bis vors Vogelhüsli und schimpfe derby lut vor mi hi.....
Das cheibe Büsi weiss genau, dass es der Grund vo däre Aktion isch und gumpet vom Boumstamm wo s'Hüsi druffe steit abe. I bringes nid übers Härz und schiessen ihm nume chlei Schee nache.
Plötzlich rüeft der Urs....uuhhh, i gloube der Benu het öppis verwütscht!" So, auso jetz längst definitiv! I ga use und gseh, dass vor em Beni es Vögeli huuret......i weiss nid öbs nume Angscht het, oder öbers scho verletzt het. I nime das chlyne Wäse uf d'Hand, putzen ihm fyn der Schee ab em Chöpfli. Nach es paarne Sekunde schüttlet sich das Vögeli und flügt wieder wäg.
"Vo jetz a Kater, kennen i kei Erbarme meh, das säg der auso." Z'Büsi luegt mi nume liecht gnärvt a und louft dervo.
Es geit ke Viertelstund, gsehn i de Kater scho wieder vor em Vogelhüsli luure. Wieder nimen i s'Chübeli mit em Wasser ga use und dusche de Benu vou. So, jetz hesch der Dräck du frächi Chatz! Das Spieli het sich --- dir gloubets nid --- no 4 Mal wiederholt.
Was hei o die Chatze für herti Gringe.....und der Benu isch doch gar ke Bärner!