Dienstag, 12. September 2017

Sit dir normal?

Sit dir normal? I meine, heit dir s'G'füehl, dir siget normal? Jäää...... wenn dir öich da nume nid düschit. I weiss vo was i rede. Füfzg Jahr lang han i nämlich ou gmeint i sigi ganz ä normali Frou. Bis i drvo ha afa rede nach Kanada uszwandere, zu mene Maa won i nume vom Internet und vom Telefoniere här ha kennt. Da bin i ungereinisch ke normali Frou me gsi. Gar mängi Meinig han i mir zu mine Uswanderigs Idee müesse  alose:"Du kennsch de Tip doch gar nid richtig. Was machsch de, wenn's nid so unsechunnt wie du dänksch es sötti usecho? Und überhoupt, was wotsch de in däm Kanada? Du hesch doch e Vogu, i dim Auter no so öppis verruckts ga mache." Je nu,  i ha s'Beschte us mine Wächsujahr gmacht und ha nid nume d'Hormon gwächslet, sondern ou d'Heimat. I bi mit einefüfzgi  nach Kanada usgwandert. Ha mis ganze Läbe ufe Chopf gschteut.  Die einte hei scho rächt gha, es isch nid aues so usecho wien is erwartet ha gha und nid aues isch besser gsi aus Deheime i dr Schwiz.....aber angersch.......ganz angersch.  Sit letschtem April bin i 16 Jahr in Kanada, im September si mir 16 Jahr ghürate und sit 10 Jahr bin i jetz ou Kanadierin.
Mängisch isch es guet nid normal d'si und überhoupt, wo isch dr "fun" wenn me gäng nume isch wie au die andere und nie öppis macht wo me nid sicher isch wien es usechunnt?
I däm Sinn e liebe Gruess us Kanada.......

6 Kommentare:

  1. Alfred Steiner ... und 2. kommt es anders, wie man denkt..... Vo all dene, wo gseit händ und gmeint händ und überhaupt ... Vo dene ghörsch allne nüt meh. Ich glaube vill sind niidisch, will Du de Muet gha häsch, eifach z'gah. Bi mir isch es no e chli schlimmer gsii. Ich han ja schliessli e Ussländeri ghüratet und dänn no vo Sri Lanka, wo die Meischte nur känned, will mer über 45'000 Sri Lankans i de Schwiiz händ. Die Meischte vo dene sind allerdings Tamile und ich han e Sihalesin ghüratet und das isch d'Mehrheit in Sri Lanka, was die Wenigschte Schwiizer wüssed. Die paar, wo da here i'd Ferie chömed, mached diesbezüglich de Brate nöd feiss. .... und so hät mer Eus inzwüsche vergässe und das, obwohls Internet gitt. Di Eintä händ no Wette abgschlosse, wie langs wohl gaht, bis i wieder i de Schwiiz uuftauche. Natürlich abbrännt und verarmt, will's mer da alles Gäld abgnoh händ. Sie warted jetzt scho 14 Jahr. Ich hetti gärn Müüsli gspillt, zum lose, was mer über Eus verzellt hät, i de Schwiiz. Vo dem Wahnsinnigä, wo sini Firma verchauft hät und wo mit sinere Schoggi brune Frau eifach gange isch .....

    AntwortenLöschen
  2. Claudia Marolf schön gschriebe - aber gliechwohl normau - eifach chlei anders aus anderi, aber uf jede Fau normal!

    AntwortenLöschen

  3. Alfred Steiner



    Alfred Steiner Du häsch Rächt Wilma .... Weisch ... mir hät mer bis hüt nöt chöne verzeihe, das ich die Usländeri ghüratet han und da gahts eher um Mini Chind. Du häsch aber Rächt, will ich bin natürli nie meh i de Schwiiz gsii. Wänn i dänn uuswandere, dänn scho richtig und dänn mues ich nöd jedes Jahr i'd Schwiiz i's Ferie. Ich mues natürli au säge, dass ich eigentlich nie Heiweh gha han. Wie gseit ... ich bin für all und jede, über Internet, oder Telefon, immer z'erreiche gsii.Mini Mailadresse und Telefonnummere sind scho bekannt gsii, bevor ich uusgwanderet bin .... „wink“-Emoticon

    AntwortenLöschen
  4. Ursula Thierwächter Also i muess jetz mi Sänf ou no drzue gä. Vieli Fründe si mir treu blibe, ou no nach 16 Jahr düe mir telefoniere und schriebe. Es si aber ou es paar Fründschafte uf dr Strecki blibe und nöii sie drzue cho......aues in auem bin i zfriede „smile“-Emoticon

    AntwortenLöschen
  5. Alfred Steiner Würklichi Fründe chammer ja eh a einere Hand abzellä und 3 vo dene läbed bereits nüme. Wie Du aber seisch Ursula Thierwächter ... es gitt defür neui Fründe und die hani halt in Thailand und de Phillipine gfunde. Da in Sri Lanka hät's nanig zu richtige Fründschafte glanget. Keine traut em Andere und es wird nöd nur zur Not gloge. Da isch es halt dänn schwirig.
    Fründschafte wie i de Schwiiz, gitt's in Asie eigentlich ehner weniger.

    AntwortenLöschen

u blibet gäng wie dr sit.....

  I weiss nid wie dier da drüber dänkit....aber mi het de Spruch vo Hüt am Morge dr ganz Tag beschäftiget. Im Musigwälle Wunschkonzärt het e...